Embaixadór Indonézia ba Timor-Leste, Sahat Sitorus. Imajen/Tatoli.

DILI, 25 setembru 2019 (TATOLI) – Embaixadór Indonézia iha Timor-Leste, Sahat Sitorus husu ba Governu Timor-Leste atu trata negosiante Kampung Alor ho dignu, hafoin halo re-alokasaun ba área Golgota iha Komoro.

“Desizaun Governu ita tenke apoia, maibé husu mós kria kondisaun liuliu fatin atu hala’o atividade negósiu, maibé bele hela mós iha ne’ebá hanesan sira-nia uma Meskita atu labele bá-mai” Embaixadór Sahat Sitorus iha Sentru Konvesaun Dili (CCD, sigla portugés), Ohin.

Diplomata Indonézia ne’e dehan negosiante indonéziu sira  ne’e, la’ós de’it mai buka osan no hahán, maibé fó mós han ba ema seluk ka fó servisu ba timoroan sira.

“Hanesan Embaixadór Indonézia iha Timor-Leste apoia  desizaun Governu no ita hanesan sidadaun estranjeiru ita tenke hakruuk ba lei”, katak.

Nune’e, nia husu ba Governu, kuandu hakarak halo re-alokasaun duni, entaun presiza asegura mós seguransa ba negosiante sira tanba ta’uk maka sira muda ba iha ne’ebá, sira la sente hakmatek iha fatin refere.

Tanba ne’e, nia sujere atu Governu Timor-Leste kontinua halo negosiasaun ho negosiante Kampung Alór hodi bele halo re-alokasaun, la’ós iha loron 1 to’o 10 outubru, maibé muda ba 1 janeiru.

Iha fatin hanesan, Diretór Jerál Komérsiu, Cosme  Fátima Baptista da Silva, hateten sei informa fali ba Konsellu Ministru atu deside, maibé ba negosiante  na’in-50 ne’ebé enxe formuláriu  no kontratu ona ho kompañia China Development iha outubru presiza muda ona.

“Ita sei hato’o ba Konsellu Ministru katak negosiante 207, na’in-50 mak hakarak muda ona, ne’ebé ita fasilita sira bá uluk, depois maka ita re-aloka fali  negosiante seluk no diskute fali ba  hela fatin”, realsa.

Kona­-ba seguransa, Cosme Silva dehan Ministériu Turizmu, Komérsiu no Indústria inklui Polísia Nasionál Timor-Leste (PNTL) Munisípiu Dili Koopera malu ona atu fó apoia seguransa iha fatin refere.

Entretantu, Komandante PNTL Munisípiu Dili, Armando Monteiro, prontu atu garante no asegura desizaun Governu ne’ebé ho hanoin ba dezenvolve Timor-Leste.

“Ami koordena ona ho autoridade lokál atu harii postu vijilánsia ida iha área Golgota atu asegura seguransa ba negosiante indonéziu sira”, afirma.

Jornalista : Florencio Miranda Ximenes

Editora : Maria Auxiliadora

 

HAKEREK NO HATÁN

Please enter your comment!
Please enter your name here