Foto hamutuk iha Thai PBS, Bangkok. Imajen/Thai PBS

BANGKOK, 23 setembru 2019 (TATOLI)—Thai Public Broadcasting Service (Thai PBS) ho Konsellu Imprensa (CI-sigla Portugés) Timor-Leste halo komunikasaun atu oinsá mak parte rua luta kombate hoax (informasaun falsu) ho  diskursu ódiu (hate speech) ne’ebé livremente espalla iha rede sosiál.

Prezidente CI, Virgílio da Silva Guterres, entrega prende “Uma Tradisionál Timor” ba Diretora Jenerál Thai PBS, Wilansinee Phiphitkul. Imajen Tatoli/Francisco Simões

Liuhusi soru-mutuk entre Prezidente CI, Virgílio da Silva Guterres ho dirijente sira Thai PBS  nian ne’ebé hala’o iha salaun Thai PBS, Bangkok, ohin, parte Thai PBS nian aprezenta mós sira-nia preokupasaun hanesan mós rai seluk nia preokupasaun kona-ba informasaun  falsu ho diskursu ódiu ne’ebé livremente espalla iha mídia sosiál, ohin loron.

“Ha’u mós hateten ba Thai PBS sira katak, ida ne’e sai mós preokupasaun iha Timor-Leste. Tanba ita hatene iha periúdu kampaña polítika no eleisaun jerál, ita haree katak  hoax ho diskursu ódiu la’o no kontinua la’o hela iha Timor to’o agora,” hateten Prezidente CI, Virgílio da Silva Guterres, hodi responde jornalista sira hafoin soru-mutuk ho  dirijente sira Thai PBS nian.

Liuhusi diskusaun ne’e Thai PBS hatudu nia prontidaun atu koopera ho CI atu parte rua enfrenta situasaun ne’e no sujere atu parte rua halo semináriu hamutuk iha Dili atu fórmula konseitu mútua ida, hamutuk kombate problema boot hoax ho diskursu ódiu.

Asuntu seluk mak Thai PBS aprezenta ne’e mak digital disruption ne’ebé iha relasaun ho plataforma dijitál online ne’ebé mosu bar-barak hodi fó ameasa ba mídia tradisionál sira (mídia  imprime). Tanba ne’e, Thai PBS ho CI buka kolabora malu atu oinsá enkoraja mídia tradisionál bele eziste iha situasaun sira ne’e.

Jornalista: Francisco Simões

Editór: Xisto Freitas

HAKEREK NO HATÁN

Please enter your comment!
Please enter your name here