Prezidente CI, Virgílio da Silva Guterres ho Diretora Jenerál Thai PBS, Wilansinee Phiphitkul asina MoU iha salaun Board Thai PBS iha Bangkok, segunda (23/09/2019). Imajen Tatoli/Francisco Simões

BANGKOK, 23 setembru 2019 (TATOLI)—Konsellu Imprensa (CI-sigla portugés) Timor-Leste ho Thai PBS (Thai Public Broadcasting Service), ohin, asina ona Memorandu Entendimentu (MoU-sigla Inglés) hodi kolabora malu iha área esensiál tolu.

MoU ne’e asina diretamente hosi Prezidente CI, Virgílio da Silva Guterres   ho Diretora Jenerál Thai PBS, Wilansinee Phiphitkul, iha salaun Board Thai PBS  iha Bangkok, ne’ebé asiste mós hosi dirijente sira Thai PBS nian ho mós membru CI, Paulo da Cruz de Araújo ho Francisco Belo Simões da Costa.

Memorandu Entendimentu  ne’e asina hafoin enkontru ne’ebé CI halo ho Thai PBS iha fulan hirak liubá ho área esensiál tolu mak hanesan, ida, CI hamutuk ho Thai PBS atu prodúz dokumentáriu ida ne’ebé konsentra iha setór ne’ebé mak durante ne’e povu no Governu Tailándia halo hamutuk ho povu no Governu Timor-Leste, liliu iha relasaun ho programa dezenvolvimentu ne’ebé mak Tailándia halo hela ba Timor-Leste ne’ebé mak Liurai Tailándia nia oan feto introdúz mak hanesan dezenvolvimentu sustentável enérjia alternativa.

Iha área produsaun dokumentáriu ne’e, Thai PBS mós hakarak halo produsaun filme kona-ba saida mak Tailándia halo iha ámbitu prezensa misaun forsa  internasionál INTERFET iha 1999-2000. Tanba tinan 20 liubá (20 setembru 1999-20 setembru 2019), forsa armada Tailándia nian mós hola parte iha misaun INTERFET ne’ebé área operasaun konsentra iha Baucau no fatin seluk-tan.

Área segundu, Thai PBS ho CI konkorda loke posibilidade atu halo interkámbiu ba treinamentu profisionál nian  atu fó oportunidade ba Timor-Leste haruka ninia  profisionál mídia sira (jornalista)  atu bele buka esperiénsia iha Bangkok, liuhusi estájiu iha Thai PBS atu apriende no esplora koñesimentu balun iha Bangkok.

Terseiru, CI ho Thai PBS konkorda hodi tuur hamutuk ko’alia kona-ba konteúdu jornalístiku ne’ebé CI aseita, maibé barak liu sei ko’alia fali ho Rádiu no Televizaun Timor-Leste, Empreza Públiku (RTTL.EP) atu haree posibilidade ne’e hodi troka konteúdu  jornalístiku, katak, notísia balun ne’ebé públika iha Thai PBS iha relevánsia ho Timor-Leste bele públika mós iha RTTL.EP ka notísia ne’ebé RTTL.EP prodúz iha relevánsia  ho Tailándia bele públika mós iha Thai PBS.

“Aspetu tolu ne’e mak sai hanesan esénsia hosi Memorandu Entendimentu ne’ebé CI ho Thai PBS halo,” informa Prezidente CI, Virgílio da Silva Guterres, ba jornalista sira, hafoin asina Memorandu Entendimentu ne’e.

Iha programa halo dokumentáriu ne’e, Thai PBS sei halo iha tinan ida ne’e. Nune’e, iha novembru, tinan ne’e, ekipa Thai PBS sei mai Timor-Leste  atu hahú prosesu produsaun dokumentáriu ne’e  no hosi parte CI nian  Thai PBS husu atu apoia kontaktu fonte sira  ne’ebé sira identifika atu entrevista mak hanesan figura eminente sira; Xanana Gusmão, Marí Alkatiri ho sira seluk-tan.

Ba programa rua seluk, tuir Prezidente CI  katak, CI sei ba diskute fali no posível bele hahú iha tinan oin (2020).

Iha biban ne’e, Thai PBS konvida CI atu bele hola parte mós hanesan observadór iha konferénsia Konfederasaun Jornalista Ázia nian, ne’ebé dadaun ne’e Tailándia mak lidera  no iha tinan oin lideransa ne’e atu entrega ba Indonézia liuhusi konferénsia ne’ebé atu halo iha Bali iha finál  marsu 2020.

“Hosi parte CI nian ami prontu partisipa no  ha’u fó hanoin ba Thai PBS atu bele karik konvida mós Asosiasaun Jornalista sira iha Timor-Leste hanesan Timor-Leste Press Union (TLPU) ho  Asosiasaun Jornalista Timor-Leste (AJTL) hola parte hanesan observadór no loke oportunidade atu aban bainrua bele hola parte iha plataforma ne’e,” informa Virgílio Guterres.

Jornalista: Francisco Simões

Editór: Xisto Freitas

HAKEREK NO HATÁN

Please enter your comment!
Please enter your name here