Sekretáriu Estadu Komunikasaun Sosiál (SEKOMS), Merício Juvinal dos Reis "Akara" akompaña ho Diretór Nasionál Sentru Rádiu Komunidade, Abel da Conceição no Prezidente Ajénsia Notisioza Timor-Leste, José da Costa, entrega komputadór ka dekstop ida, tape recorder rua no bateria APC ida ba Rádiu Tokodede Likisá. Foto/Florencio M. Ximenes.

DILI, 18 Setembru 2019 (TATOLI)-Governu liuhusi Sekretáriu Estadu Komunikasaun Sosiál (SEKOMS) entrega motor 16 ba sentru rádiu komunitáriu sira hodi fasilita serbisu liuliu hodi serbí komunidade sira liuhusi informasaun kredivel sira iha zona remota kona-ba atividade governativa no vise-versa.

Sekretáriu Estadu Komunikasaun Sosiál, Merício Juvinal dos Reis ‘Akara’. Imajen/Egas Cristóvão

“Uainhira ha’u vizita sira, sira mós hato’o mai ha’u sira-nia difikuldade, difikuldade kona-ba fasilidade hanesan transporte no komputadór, sira iha tebes commitment (kompromisu) atu hala’o sira-nia knaar maibé munisípiu balun, suku balun dook malu nune’e sira presiza fasilidade hodi apoiu sira to’o iha fatin hodi halo kobertura,” hateten Sekretáriu Estadu, Merício Juvinal dos Reis “Akara” ba jornalista sira hafoin entrega motorizada sira ne’e, iha Farol, ohin.

Tanba ne’e, tuir SEKOMS, nia orienta diretór sira oinsá bele ko’alia ho jestór rádiu komunidade sira hodi responde problema ne’ebé sira enfrenta.

“Entaun iha parte tékniku diretór ho jestór sira halo jestaun di’ak nune’e sira hola duni motor 16 ba estasaun rádiu sanulu resin neen ne’e hanesan resposta balu ne’ebé governu hakarak fó bazeia ba sira-nia preokupasaun”.

“Maibé, iha parte seluk la’ós de’it apoiu motor maibé sei apoiu mós ho komputadór no tape recorder (gravadór) rua kada rádiu estasaun komunidade bazeia ba sira-nia preokupasaun,” kompromete governante ne’e.

Nia mós kompromete katak alende governu apoiu transporte no komputadór, governu mós prevee rihun 15 ba kada estasaun rádiu komunidade sira.

“Tinan oin mantein nafatin tau planu ba montante ne’ebé hanesan hodi apoiu ba rádiu komunidade sira. Maibé, jestaun tenke di’ak, se jestaun ladi’ak bele mós menus husi 15 ou bele la hetan liu tanba prosedimentu aplika regra mós aplika,” informa Sekretáriu Estadu, Merício Akara.

Iha Biban hanesan, SEKOMS agradese mós ba parseiru tékniku UNICEF (United Nation Internasionál Children Emergency Fund) ba apoiu ekipamentu sira hanesan komputadór no audio-gravadór ba sentru rádiu komunitáriu sira. Ida ne’e hatudu katak governu la servisu mesak maibé servisu hamutuk ho parseiru hanesan UNICEF atu kontinua apoia radio komunidade.

SEKOMS fó hanoin katak rádiu komunidade tenke serbisu ho di’ak fornese informasaun kredivel, fasilita informasaun ba komunidade iha área rurál, orienta jornalista iha rurál atu bele servisu ho profisionál.

“Labele haluha prinsípiu rádiu komunidade, komunidade maka tenke na’in, komunidade mak loron ruma sei sustenta sira no parseiru sira, governu hanesan komplementár atu kontinua apoia,” espera Sekretáriu Estadu, Merício Akara.

Ho apoiu ne’ebé SEKOMS oferese, iha biban ne’e, Jestór Rádiu Komunidade Mauloko Maubise, Joaquim de Fátima Coutinho sente kontente no kompromete sei utiliza ho di’ak.

“Ami mós hein katak apoiu transporte ne’ebé maka fó mai ami rádiu sira, ami bele utiliza ho didi’ak hodi bele hala’o serbisu ho di’ak liuliu kona ba kobertura kada munisipiu no aldeia sira,” dehan jestór ne’e.

Notísia relevante:SEKOMS Oferese Audio-Gravadór Rua Ho Komputadór Ida Ba Rádiu Rai Husar Aileu

2020, SEKOMS Kompromete Kontinua Apoia Rádiu Komunidade Sira

Jornalista: Nelia Borges

Editór      : Rafy Belo

HAKEREK NO HATÁN

Please enter your comment!
Please enter your name here