Jestór Rádiu Komunidade Aileu simu oferta husi SEKOMS. Foto TATOLI: Felicidade Ximenes

AILEU, 14 setembru 2019 (TATOLI)-Sekretáriu Estadu Komunikasaun Sosiál (SEKOMS), Mericio Juvinal dos Reis “Akara” akompaña husi Diretór Nasionál Sentru Rádiu Komunitáriu (CRC-sigla portugés), Abel da Conceicão, inklui mós Sekretáriu Estadu Arte no Kultura (SEAK), Teofílio Caldas oferese audio-gravasaun ida rua ho komputadór ida ba Rádiu Komunidade, Rai Husar Aileu.

“Ita halo planu no ita mós ko’alia ho ita-nia parseiru sira oinsá hahú resposta ba ita-boot (rádiu komunidade) sira-nia preokupasaun duni. Agora ne’e ita kolabora ho UNICEF fó komputadór ida ho tape recorder rua ba rádiu komunidade hotu iha munisípiu,” hateten Sekretáriu Estadu, Merício Akara molok oferese ekipamentu sira ne’e iha Rádiu Komunidade Rai Husar, iha Aileu Vila, ohin.

Sei Fó Motor Ida

Governante ne’e kompromete mós katak sei kontinua mós fó transporte hanesan motor ida, ida,   ba rádiu komunidade hotu hodi fasilita servisu nian tanba, tuir nia,  sentru rádiu komunitáriu sira informa ona katak atu halo kobertura ba iha suku sira dalaruma transporte mak sai difikuldade tanba ne’e mak SEKOMS responde uitoan-uitoan.

Tinan oin sei subsídiu ba rádiu komunidade hotu tanba ida ne’e governu nia polítika no konsidera rádiu komunidade ne’ebé mak besik liu ita-nia populasaun presiza kontinua halo kna’ar hanesan atividade ka eventu ne’ebé besik, presiza halo kobertura.

“Rádiu Komunidade Rai Husar Aileu labele servisu mesak maibé tenke servisu ho Ajénsia Notisioza Timor Leste ho Rádiu Televizaun Timor-Leste (RTTL) tanba instituisaun tolu ne’e hetan subsídiu husi estadu no sai hanesan estadu-nia  mídia, entaun objetivu  hanesan halo kobertura ba atividade governativa hothotu husi nasionál to’o baze,” tenik SEKOMS.

Sekretáriu Estadu, Merício Akara fó hanoin, Ajénsia TATOLI-Ajénsia ofisiál estadu Timor-Leste, RTTL no Rádiu Komunidade Rai Husar Aileu tenke kolabora hamutuk. Se de’it mak iha informasaun bele transmite fali ba ida seluk hodi halo fali ba notísia. “Nune’e mós RTTL halo ona notísia ita-boot sira relata ona para notísia nasionál tun ba kraik ne’e ida de’it ho odamatan ida ho sumber (fontes) ida para labele kahur malu hodi públiku konfuzaun”.

Nia reforsa, mídis privadu sira mós iha liberdade atu halo kobertura maibé mídia estadu nia tenke kobertura no transmite informasaun ne’ebé kredivel no loos.

Promove ita-nia poténsia pozitiva nasaun nian hanesan atividade kulturál, sentru turístiku sira, fatin istóriku sira, atividade kultura, atividade agrikultura ne’ebé mak sai pozitivu ba ita-nia nasaun; instituisaun tolu ne’e sai mós responsabilidade .

“Entaun ekipamentu sira ne’ebé mak entrega ne’e atu reforsa de’it ita-boot sira-nia servisu no governu sei kontinua, sei apoia nafatin ba oin,” garante sekretáriu estadu.

Enkuantu, Rádiu Komunidade Rai Husar Aileu, reprezenta husi Administradór Munisípiu Aileu, João Tilman do Rego agradese SEKOMS nia esforsu no espera katak sira seluk ne’ebé mak seidauk hetan, loron ikus, etapa ba etapa bele kontinua responde nafatin ba oin.

“Ekipamentu sira ne’ebé mak oferese hodi fasilita ita-nia pesoál sira hodi halo hela jestaun ba iha rádiu komunidade no halo mós kobertura  ba atividade hothotu ba nivel munisipiu nian, bele mós transforma informasaun liuliu relasaun ho atividade governativa nian iha munisipiu,” dehan autoridade munisipál ne’e.

Notísia relevante:Postu Administrativu Tolu Seidauk Asesu Rádiu Komunidade Rai Husar

Jornalista : Felicidade Ximenes

Editór       : Rafy Belo

HAKEREK NO HATÁN

Please enter your comment!
Please enter your name here