Sekretáriu Estadu Komunikasaun Sosiál (SEKOMS), Merício Juvinal dos Reis "Akara" akompaña ho Diretór Nasionál Sentru Rádiu Komunidade, Abel da Conceição no Prezidente Ajénsia Notisioza Timor-Leste, José da Costa, entrega komputadór ka dekstop ida, tape recorder rua no bateria APC ida ba Rádiu Tokodede Likisá. Foto/Florencio M. Ximenes.

LIKISÁ, 11 setembru 2019 (TATOLI) – Sekretáriu Estadu Komunikasaun Sosiál, Merício Juvinal dos Reis “Akara”, hatete Oitavu Governu kompromete ona kontinua fó subsídiu no apoia ekipamentu ba rádiu komunidade sira iha territóriu Timor-Leste.

“Tinan ne’e, ita ezekuta ona transferénsia públika ho fó subsídiu ba faze dahuluk no ha’u rona Diretór Nasionál CRC katak transferénsia daruak iha ona prosesu. Tan ne’e tinan oin ita kontinua apoia subsídiu ba rádiu komunidade sira,” SEKOMS Akara hatete iha Rádiu Komunidade Tokodede, Likisá, ohin.

SEKOMS mós sente kontente tanba esforsu CRC iha tinan ne’e sei apoiu motór ida-ida ba rádiu komunidade 16 iha territóriu Timor-Leste.

“Ita mós sei kontinua kolabora ita-nia parseiru hanesan UNICEF para apoia mós desktop no tape recorder ba rádiu komunidade sira hotu para responde preokupasaun balun”, katak.

Tanba ne’e, Merício Akara husu atensaun ba rádiu komunidade sira tenke mantén komunikasaun no kolabora ho Governu.

“Mensajen forte ba rádiu komunidade sira mak tenke dezenvolve aan nafatin no tenke adapta ita-nia kondisaun atuál liuliu iha era dijitál. Hahú adapta aan atu dezenvolve rádiu komunidade atu tama mós online atu ema bele asesu rádiu liuhosi online”, sujere.

Iha fatin hanesan, Diretór Nasionál Sentru Rádiu Komunidade (CRC, sigla portugés), Abél da Conceição, salienta tinan ida ne’e Estadu aloka ona rihun $240 ba rádiu komunidade 16 iha Timór laran.

“Primeira transferénsia ba kada rádiu komunidade ita halo ona, agora, sira ezekuta hela orsamentu ne’e, iha fulan ida ne’e duni depois sira ezekuta hotu primeira transferénsia ne’e sira halo relatóriu no submete kedas proposta segundu para ita kontinua halo transferénsia para ita kompleta tinan ida transferénsia dala rua”, dehan.

Montante subsídiu ba kada rádiu ne’e politikamente rihun $15, maibé téknikamente liuhusi avaliasaun ne’ebé mak halo la’ós tenke fó rihun $15 tanba haree ba situasaun ne’ebé mak kada rádiu komunidade presiza.

“Ita deteta kada rádiu hasoru difikuldade ba ekipamentu, entaun aléinde apoia liuhusi Governu ne’ebé uza orsamentu transferénsia públika, ita haree ne’e la to’o. Entaun, CRC halo kooperasaun ho ajénsia internasionál sira liuhusi UNICEF no UNDP atu apoia ekipamentu sira hanesan desktop, tape recorder no bateria APC”, afirma.

Iha oportunidade halo kooperasaun ho ajénsia internasionál sira UNICEF, UNDP no iha fulan balun tan halo kooperasaun ho KOICA ho intensaun atu kontinua suporta ekipamentu ba rádiu komunidade sira atu profisionaliza aan iha servisu jornalizmu nian.

“Ajuda sira mak UNICEF komesa apoia ona rádiu komunidade sira liuhusi CRC ne’ebé ita lori no apoia ona ba rádiu komunidade sira inklui Rádiu Tokodede ne’e. Ita sei kontinua distribui ba rádiu sira seluk iha Timór laran tomak”, nia kompromete.

Notísia relevante : SEKOMS Apoia Komputadór no Tape Recorder ba Rádiu Tokodede

Jornalista : Florencio Miranda Ximenes

Editora : Maria Auxiliadora

2 KOMENTÁRIU

  1. Secoms nona comentário katak sei kontinua do apoio na rádio comunidade no media social dirá seluk, Maine faktus oin seluk, Tamba iha rádio no media dirá hatama nos proposta demais a mais,media dirá bebê lidera husi ema resistência lá considera, no aprova bebê nos grupo, ida nee ami hussu precisa hadiah sistema grupissmo,familiarizando, regionalismo,sectarismo iha governo nos laran

  2. Secoms nia comentário katak sei kontinua fo apoio ba rádio comunidade no media social sirá seluk, Maibe faktus oin seluk, Tamba iha rádio no media sirá hatama nos proposta demais a mais,media sirá nebe lidera husi ema resistência lá considera, no lá aprova nebê grupo ida nee ami hussu precisa hadiah sistema grupissmo,familiarizando, regionalismo,sectarismo iha governo nos laran

HAKEREK NO HATÁN

Please enter your comment!
Please enter your name here