Diretór Yayasan HAK, Manuel Monteiro Fernandes. Imajen/Dok

DILI, 13 setembru 2019 (TATOLI)-Diretór Yayasan Hak, Manuel Monteiro Fernandes, husu ba órgaun kompetente atu bele loke investigasaun profunda ba atitude oknum Polisia Nasionál Timor-Leste (PNTL) ne’ebé kontinua baku joven.

Notísia Relevante : Ministru Filomeno “Hirus” Oknum Polisia Kontinua Baku Joven

Yayasan HAK hasai rekomendasaun ne’e relasiona ho atitude membru PNTL balun ne’ebé ikus-ikus ne’e baku joven sira, ne’ebé Yayasan HAK deskonfia bele kontribui hamosu situasaun instabilidade iha rai laran.

“Ha’u dehan nune’e tanba ema ida la brani halo krime hanesan ne’e, enkuantu nia la asume kargu hanesan ne’e, tanba membru Polisia asume kargu polisia públiku tanba nia iha forsa nune’e mós nia iha atributu ne’ebé mak estadu fornese ba nia,” afirma Diretór Yayasan HAK, Manuel Monteiro Fernandes, ba Ajénsia TATOLI iha salaun Madre Raikotu, Comoro, Dili, kinta (12/09/2019).

Notísia Relevante : Komandu PNTL Investiga Polísia Baku Joven iha Baukau

Nia afirma tan, atitude baku ema ne’e viola direitu umanu no polisia nia knar la’ós atu baku ema, maibé atu mantein Lei ho Orden.

“Se ita nia sidadaun ida sala no komete krime, polisia ba kaer tau borgol lori mai sela hodi halo investigasaun no submete ba lei. La’ós baku,” hateten Manuel Monteiro.

Notísia Relevante : PNTL Seidauk Simu Informasaun Oknum PNTL Tortura Membru Grupu Ilegál

Nia hateten, tuir loloos ne’e membru sira baku ema ne’e tenke rekoñese membru polisia nia sala no husu deskulpa la’ós konsiente fali nia membru no defende fali sira entaun kazu hanesan ne’e repete beibeik.

Diretór Yayasan HAK rekomenda ba Komandu PNTL katak atu labele akontese kazu ne’ebé mak hanesan, dahuluk superior sira tenke kontinua fó formasaun atu nune’e ninia membru sira hatene no komprende di’ak kona ba lei no orden.

Daruak instituisaun estadu tenke tau matan ba instituisaun seguransa sira nia kondisaun moris ne’ebé mak mínimu tenke hela iha kazerna labele hela hamutuk ho komunidade ho nune’e sira bele kontrola malu.

“Polisia komunidade mak hela iha komunidade atu kontrola situasaun rai laran, maibé realidade Ita haree no akontese mak PNTL natureza dezenvolve fali ba militár no kaer kilat boot no halo formasaun hanesan militár maibé natureza rasik ne’e hatudu sivíl, to’o ona ho pistola hodi defeza ba sira-nia aan la’ós tiru no baku fali sidadaun sira,” afirma Manuel Monteiro.

Jornalista  : Osória Marques

Editór         : Francisco Simões

HAKEREK NO HATÁN

Please enter your comment!
Please enter your name here