Polisia sira uza forsa baku lesuk joven ida iha Estadiun Munisípiu Baucau nia oin, foin lalais ne'e. Imajen foti husi Facebook

DILI, 04 setembru 2019 (TATOLI)-Ministru Defeza no Ministru Interior Interinu, Filomeno da Paixão de Jesus, lamenta no ‘hirus’ tebes ho oknum Polisia Nasional Timor-Leste (PNTL)  ne’ebé kontinua uza forsa hodi atua problema no baku joven ho kondisaun lanu todan.

Ministru Defeza no Ministru Interiór interinu, Filomeno da Paixão de Jesus. Imajen/António Gonçalves

Ministru Filomeno dehan, nia rasik preokupa bainhira haree video ne’ebé espalla iha rede  sosiál Facebook, identifika oknum polisia task force Munisípiu Baucau halo atuasaun ba problema baku joven ida durante eventu Festival Nasionál Desportu (FND) 2019 iha Estádiu Munisípiu Baucau iha loron 2 setembru, foin lalais ne’e.

“Ha’u haree ona (video polisia baku joven), ohin, ha’u bolu atensaun ba Komandu Polisia atu haree problema ne’e. Polisia labele tun baku no tebe ema, tenke iha proporsionalidade iha atuasaun, ha’u dehan ona ba komandante tenke foti prosesu haree kazu ne’e,” afirma Ministru Filomeno Paixão, ohin, ho hirus.

Ministru dehan, nia sei la simu argumentu saida de’it mak polisia aprezenta, tanba haree husi video oknum polisia atua problema baku no tebe lisuk joven ida ne’e la iha razaun. Tanba knaar polisia atu solusiona problema, la’ós uza forsa rezolve problema.

“Ha’u hakarak hatene se mak sala, tenke lori nia ba hasoru justisa no dixiplina no hasoru mós tribunál, tanba ita labele ba tebe ema arbiru, nusa la tau de’it borgol ba nia liman,” Ministru Filomeno lamenta.

Nia hatutan, se kazu ne’e la solusiona tuir lei, Ministru Defeza no Ministru Interiór interinu promete sei propoin ba Primeiru-Ministru, Taur Matan Ruak, atu revee mandatu no knaar PNTL nian tuir lei.

“Se kontinua beibeik ha’u rasik sei propoin ba primeiru ministru atu ita revee fila fali komandante polisia, tanba nia la hola medida ne’ebé ha’u fó sai ona tuir polítika governu,” tenik Ministru ho hirus.

Relasiona ho kazu ne’e, TATOLI tenta konfirma Portavós PNTL nu’udar mós Komandante Operasaun PNTL, Superintendente Xefe Pedro Belo seidauk fó komentáriu tanba okupa ho servisu.

Jornalista : Eugénio Pereira 

Editór       : Francisco Simões

1 KOMENTÁRIU

  1. NE joven mak lanu, maibe foin lalais fulan hat liu ba polisia lanu baku joven to teler ne sr. lian la sai. polisi lanu baku joven, joven lanu polisia baku, joven sai vitima no tebe o nafatin ba hahaklok polisia nian.

HAKEREK NO HATÁN

Please enter your comment!
Please enter your name here