Enkontru Bilaterál. Foto: MNEK

DILI, 10 setembru 2019 (TATOLI)-Ministériu Negósiu Estranjeiru no Kooperasaun (MNEK) reprezenta husi Diretór Jerál Asuntu Bilaterál, Domingos Savio enkontru hamutuk ho Enkarregadu Negósiu Vatikanu iha Timor-Leste, Monseñor Marco Sprizzi, lidera enkontru bilaterál entre T-L no Santa Sé ho objetivu atu atualiza prosesu Implementasaun Akordu (Konkordata) entre Timor-Leste ho Santa Sé (Vatikanu).

Padre Vigáriu Dioseze Dili, Juvito do Rego informa katak iha enkontru ne’e parte igreja katólika hasoru malu ho MNEK koordena fila-fali, implementasaun akordu Santa Sé ninian ho Repúblika Demokrátika Timor-Leste ne’ebé hanaran konkordata.

“Iha buat barak ne’ebé seidauk implementa hanesan vistu misionáriu sira ninian, hanesan terras, propriadades, hanesan mós asuntu sira ne’ebé dokumentu formál uma kreda ninian, iha buat barak ne’ebé seidauk trata ida to’o oras ida ne’e, mai hasouru malu ho reprezentante Vatikanu ninian iha ne’e, atu buka maneira oinsá mak bele estabelese fali koordenasaun ida hodi implementa artigu hirak ne’e, dehan Padre Juvito do Rego, ba Ajénsia TATOLI, hafoin ramata enkontru, iha Salaun Enkontru, MNEK, Praia dos Coqueiros, Dili, ohin.

Amu ne’e haktuir, kestaun sira ne’e mak trata ho MNEK no depois MNEK iha ninia koordenasaun ho ministériu tutela.

Ezemplu hanesan surat legál sira nian, krime ninian, buat sira ne’e ho imigrasaun, ho Ministériu Justisa, Ministériu Interiór, Ministériu Edukasaun, Ministériu Ensinu Superior Arte no Kultura kona-ba patrimóniu, terra propriedades, Ministériu Justisa. Buat sira ne’e hotu tenke trata, maibé tenke tuir karakter konkordata ninian tenke trata iha MNEK tanba MNEK mak iha kompeténsia atu trata asuntu sira nível internasionál ninian.

“Implementasaun ida ne’e to’o agora foin mak hala’o artigu 11 ne’e mak halo ona. Akordu ida ne’ebé agora sei la’o hela,” informa amu vigáriu ne’e.

Entretantu, partisipa iha enkontru bilaterál ne’e Ministériu relevante sira hanesan Ministériu Finansas, Ministériu Edukasaun, Ministériu Saúde, Ministériu Justisa  no mós partisipante husi delegasaun Episkopál Timor-Leste nian.

Notísia relevante:Igreja no Governu Hahú Enkontru Hodi Estabelese Ekipa Diskute Konkordata ho Santa Sé

Konkordata Santa Sé Ho Timor-Leste, 50% Ba Área Edukasaun

Akordu Balun Entre Timor-Leste No Santa Sé Seidauk Implementa

Jornalista: Nelia Fernandes

Editór      : Rafy Belo

HAKEREK NO HATÁN

Please enter your comment!
Please enter your name here