Diretór Isílio Coelho. FOTO: MNEK

DILI, 02 juñu 2019 (TATOLI)-Governu Timor-Leste (TL), iha 2017, prevee finansiamentu ba igreja katólika ho valór kuaze dolár millaun 15,7 nu’udar kontribuisaun espesiál ba CET (Konferénsia Episkopál Timorense-sigla portugés) hodi kanaliza ba atividade sira hanesan luta kontra hamlaha, área intervensaun ba xave dezenvolvimentu no ba hamenus dezigualdade no eskluzaun sosiál.

Husi millaun 15,7 ne’e, porsentu 50 ba área edukativa nian, porsentu 25 ba iha área sosiál no restu porsentu 25 ba atividade governu eklesiál no jestaun.

Diretór Jerál Asuntu Bilaterál, Isílio Coelho informa katak akordu entre governu Timor-Leste ho Santa Sé balun seidauk implementa tanba fallansu tékniku no mós administrasaun.

“Akordu hotu la’o ho di’ak, karik iha ida maka ko’alia kona-ba komisaun mista, atu haree kona-ba propriedade dioseze nian ne’e maka sei paradu hela,” informa Diretór Isílio Coelho ba Ajénsia TATOLI, iha edifísiu Ministériu Negósiu Estranjeiru no Kooperasaun (MNEK), Praia dos Coqueiros, segunda ne’e.

Diretór ne’e haktuir, akordu entre Timor-Leste no Santa Sé mós iha artigu hamutuk 37 tanba ne’e la fasil atu implementa hotu tanba foin mak asina iha 2015 no agora foin halo tinan tolu ho balun.

Tuir nia, iha parte ida ita haree hotu ba kapasidade téknika funsionáriu sira nian. Nune’e mós reforsa, pontu vokál ida kaer rai lima ka liu, nune’e sira la’ós foka de’it ba Santa Sé maibé foka mós bai rai seluk ne’ebé mak iha mós akordu kona-ba buat barak. Tanba ne’e, teknikamente, administrativamente, instrumentasaun sira ne’e sei lori tempu no dalaruma implementasaun lori tempu naruk duké ita hakarak.

“Maibé ha’u haree kompromisu entre parte rua ne’e iha hela no halo progresivamente hela,” hateten Diretór Asuntu Bilaterál, Isílio Coelho.

Diretór informa mós katak planu MNEK nian ba oin sei haree no diskute kona-ba artigu sira husi artigu 37 ne’ebé paradu hela hodi toma inisiativa.

“Ha’u sente implementasaun téknika iha duni diresaun ida ne’e (asuntu bilaterál MNEK-red), ami sei haree hela no hein Santa Sé maka toma inisiativa maka mai ko’alia katak artigu ida ne’e paradu hela mezmu ita halo”.

“Ou, ita mós bele toma inisiativa dehan ba sira katak kona-ba kriasaun ba komisaun mista atu haree ba propriedade dioseze nian sei paradu hela.  Ne’ebé, tempu to’o ona atu haree buat ne’ebé mak kria ne’e kria tiha ba, para pois hala’o serbisu ne’ebé maka ita prevee tiha ona iha akordu,” reforsa tan diretór ne’e.

Lee mós notísia: http://www.tatoli.tl/2017/06/atividade-ekleziastika-governu-apoia-osan-millaun-15-7/

http://www.tatoli.tl/2017/06/relasaun-timor-leste-ho-vatikanu-ekstraordinariu/

http://www.tatoli.tl/2017/10/don-basilio-hasoru-primeiru-ministru-hodi-konfirma-konkordata/

Jornalista       : Nelia Rosario

Editór             : Rafy Belo

HAKEREK NO HATÁN

Please enter your comment!
Please enter your name here