DILI, 05 setembru 2019 (TATOLI)- Governu Timor-Leste no Komandu Polisia Nasionál Timor-Leste inklui Komandu FALINTIL-Forsa Defeza Timor-Leste, sesta aban (06/09/2019), sei realiza diálogu entre povu hodi simu malu para bele re-íntegra komunidade uma kain 53 ne’ebé refuijia iha Komandu Polisia Liquiça, hafoin akontesimentu omisídiu Aldeia Baura, Suku Leorema, Postu Administrativu Bazartete, foin lalais ne’e.
Notísia Relevante : Kazu Leorema, MP Husu Aplika Prizaun Preventiva Ba Suspeitu Na’in 11
Komandante PNTL Munisípiu Liquiça, Superintendente Asistente Luis da Silva, ohin, via telefónika informa katak, diálogu ne’e sei partisipa direita husi membru governu sira, Segundu Komandante Jerál PNTL Komisáriu Mateus Fernandes, inklui Komandante F-FDTL ho autoridade Munisípiu Liquiça rasik.
Antes ne’e, ekipa Diresaun Nasional Prevensaun Konflitu, Ministériu Interior (DNPKK-Ministériu Interior (MI) servisu hamutuk ho autoridade seguransa no autoridade Munisípiu Liquiça halo ona aproximasaun no hasoru malu ho Xefe Aldeia, Membru Konsellu Suku Leorema, no parte hosi família vítima, atu buka solusaun ba kazu konfrontasaun entre juventude sira.
Notísia Relevante : DNPKK-MI Buka Solusaun Liuhusi Mediasaun Ba Kazu Leorema
Kazu omisídiu ne’ebé akontese iha loron 04 Jullu 2019, rezulta ema na’in 2 mate no sunu uma 13 inklui sunu motór hitu hodi halo komunidade uma kain 53 refuijia ba Komandu PNTL Liquiça.
Jornalista : Eugénio Pereira
Editór : Francisco Simões
