Membru Polisia Suku Leorema koopera ho Ekipa Diresaun Nasionál Prevensaun Konflitu, Ministériu Interior (DNPKK-MI) halibur komunidade sira hodi buka solusaun ba kazu konfrontasaun entre juventude iha Leorema. Imajen/DNPKK-MI

DILI, 22 jullu 2019 (TATOLI)- Ekipa Diresaun Nasionál Prevensaun Konflitu, Ministériu Interior (DNPKK-MI) servisu hamutuk ho autoridade seguransa no autoridade Munisípiu Liquiça, sesta  (18/07/2019), halo aproximasaun no  sorumutuk komunidade Suku Leorema, inklui família vítima hodi buka solusaun ba kazu omesidu ne’ebe akontese iha Aldeia Urema, Suku Leorema, Postu Administrativu Bazartete, Munisípiu Liquiça.

Notísia Relevante :  Konfrontu Leorema Kontinua, Sunu Tan Uma 13 ho Motór Hitu

Membru Polisia Suku Leorema koopera ho Ekipa Diresaun Nasionál Prevensaun Konflitu, Ministériu Interior (DNPKK-MI) buka solusaun ba kazu konfrontasaun entre juventude iha Leorema. Imajen/DNPKK-MI

Tuir informasaun ne’ebé Ajénsia TATOLI asesu husi portál Serviços Relações Públicas Ministériu Interior, ohin, relata katak, iha enkontru ne’e ekipa DNPKK-MI lidera husi Xefe Departamentu Rezolusaun Konflitu-DNPKK, Julião Fernandes halo aproximasaun lideransa komunitária Suku Leorema no PNTL Munisípiu Liquiça atu buka solusaun oioin hodi hakotu kazu Leorema.

“DNPKK ninia knaar ida mak prevene situasaun ida ne’e labele repete fila fali, konflitu ne’e labele sai boot, konflitu ida tenke para ho ida ne’e, mate labele iha tan, sunu labele iha tan, ema ne’ebé hasai ema nia vida sei hatán tuir lei. Ho ida ne’e mak ita tuur hamutuk hodi buka solusaun ba problema ida ne’e liuhusi maneira oioin,” informa Xefe Departamentu, Julião Fernandes, iha ámbitu diálogu ho autoridade no komunidade Suku Leorema.

Iha prosesu aproximasaun ekipa DNPKK hasoru malu ho família vítima, Xefe Aldeia no membru konsellu suku hato’o sira-nia ezijénsia hakarak atu halo rekonsiliasaun no diálogu simu malu atu kria pás no hakmatek entre família suspeitu inosente sira, ne’ebé halai ba ai laran no sei refujia iha Komandu PNTL Munisípiu Liquiça atu fila hikas mai sira-nia fatin, maibé PNTL tenke kaptura no prosesu uluk autór sira ne’ebé seidauk entrega aan.

Tuir família vítima, Feliz dos Santos nu’udar Aman Boot hosi matebian Maun Alin ne’ebé mate iha konfrontasaun deklara família husi suspeitu sira halai ka refujia ba Liquiça ne’e bele mai no la bandu, maibé di’ak liu suspeitu sira ne’ebé sei subar ne’e, tenke entrega aan tiha lai mak sira nia família foin bele mai iha sira nia hela fatin.

“Se suspeitu la kaer mak lori família mak mai uluk sente laran ne’e moras makas, bainhira suspeitu sira ne’e prosesu ona tuir lei mak sira nia família mós bele mai tanba feto ho labarik sira la sala ida,” hateten Feliz dos Santos iha diálogu ne’e.

Iha fatin hanesan, Xefe Aldeia Urema-Suku Leorema, Carlos dos Santos hateten, ho akontesimentu krime oho malu ne’e sai hanesan lisaun ba sira hotu no sente triste, maibé sira presiza fó atensaun atu hakotu konflitu ida ne’e hodi hetan dame.

“Nu’udar autoridade lokál ha’u ko’alia neutru ho laran, bainhira ita atu hakotu problema ida ne’e ninia mekanizmu mak dalan di’ak liu rekonsiliasaun, ho mementu ida ne’e ha’u hakarak aberta de’it ba ita hotu katak dalan úniku refujiadu atu fila mai fatin ida mak ita tuur labele obriga malu, ita tuur fó hanoin ba malu, no bele ka lae ita tau família vítima no suspeitu hamutuk hodi buka mekanizmu hakotu situasaun ida ne’e,” Carlos dos Santos hateten.

Ekipa DNPKK sei kontinua halo aproximasaun ho parte família vítima no família suspeitu sira, atu buka dalan no mekanizmu oioin atu rekoopera no kria fila-fali relasaun di’ak entre parte rua bazeia ba sira-nia ezijénsia no hakarak.

Hola parte  iha aproximasaun ne’e, ekipa DNPKK kompostu hosi Xefe Departamentu Rezolusaun Konflitu, Koordenadór Prevensaun Konflitu Munisípiu Liquiça, Januáriu Brites, Koordenadór Prevensaun Konflitu Munisípiu Dili, Domingos Freitas, mediadora, Julião Fernandes, Joaquina Soares, Evalina Guterres, Januário Alves, Administradór Postu Administrativu Bazartete, João Bras, Komandante Eskuadra Bazartete, Inspetór Xefe Polisia, Manuel Maria dos Santos no Ofisial Polisia Suku (OPS) interinu Suku Leorema.

Notísia Relevante : Search Kazu Leorema Kazu Leorema,

PNTL Kaptura Ona Suspeitu 12

Familia Uma Kain 53 Seidauk Fila Ba Leorema

Kazu Leorema, Tribunal Aplika Prizaun Preventiva Ba Arguido SPS

 

Jornalista : Eugénio Pereira

 Editór      : Francisco Simões

HAKEREK NO HATÁN

Please enter your comment!
Please enter your name here