LOLOTOE, 29 Agosto 2019 (TATOLI) – Administradór postu administrativu Lolotoe, munísipiu Bobonaru, Almeiro Pereira dos Reis, konsidera lei kustumeiru no justisa tradisionál importante tebes hodi dezenvolve setór justisa.
“Ha’u hanoin lei rua ne’e pertinente tebes, tanba ita nia komunidade tuir situasaun ne’ebé mak la’o nanis ona no laiha buat ida mak regula”, dehan administrador postu ne’e ba TATOLI bainhira partisipa konsultasaun públika hosi Ministériu Reforma Lejizlativa no Asuntu Parlamentár (MRLAP) kona-ba lei kustumeiru no justisa tradisionál iha Suku Opa, ohin.
MRLAP kontinua halo konsultasaun públika ho lia-na’in no autoridade lokál husi etnia Bunak kona-ba lei kustumeiru no justisa tradisionál iha suku hitu, postu administrativu Lolotoe, munisípiu Bobonaru.
Notísia Relevante : MRLAP Halo Konsultasaun Lei Kostumeiru ho Étniku Kemak
Suku Hitu ne’e kompostu husi Opa, Lupai, Deudet, Guda, Lebos, Gildapil no Lontas ho partisipante ema 80 ne’ebé reprezenta husi lia-na’in, xefe suku, xefe aldeia, ofisiál polisiamentu suku (OPS) no seluk tan.
Notísia Relevante : MRLAP Hakarak Fó Kbi’it Lei Tradisionál
Tuir administradór kazu konkreta ne’ebé sempre mosu maka violénsia doméstika entre fen no la’en, kazu disputa rai no kazu sivíl seluk tenke rezolve iha polísia no tribunál tanba autoridade lokál no lia-na’in sira seidauk iha kbi’it hodi rezolve.
Iha biban hanesan, Diretór Eskola Bázika Sentrál Lolotoe, Matias da Costa, fiar katak ho lei kustumeiru no justisa tradisionál sei ajuda governu hodi fó justisa loloos ba povu.
Entretantu, espesialista ba lei kustumeiru no justisa tradisionál, husi MRLAP, Avelino Coelho, hatete munisípiu Bobonaru iha lisan ne’ebé estruturadu no organizadu, tanba ne’e sei fó apoiu ba Governu atu prodúz lei.
“Ha’u hanoin konsultasaun públika lei kostumeiru no justisa tradisionál iha Atabae, Maliana, Marobo no Lolotoe ba etniku Kemak no Bunak, hetan hela estrutura sosiál ne’ebé mak organizadu hela tuir lisan ne’ebé mak eziste ona”, dehan nia ba TATOLI iha Suku Opa.
Durante konsultasaun, eis Sekretariu Estadu Konsellu Ministru ne’e identifika lia-na’in no autoridade lokál sira iha koñesementu ba modalidade lei oi-oin ne’ebé bele kontribui ba MRLAP atu prodúz ba lei iha futuru.
Jornalista: Domingos Piedade Freitas
Editora: Rita Almeida
