Ministru Justisa (MJ) Manuel Cárceres da Costa, hasai fotografia ho investigadór kriminál husi PCIC na’in 30 ne’ebé foin simu pose iha edifísiu MSSI, Caicoli Dili, sesta (23/08/2019). Imajen/Espesiál

DILI, 23 agostu 2019 (TATOLI)- Ministru Justisa (MJ) Manuel Cárceres da Costa, observa katak, Tribunál anula kazu barak tanba dadus investigasaun l hatudu provas forte ba juis atu foti desizaun.

Notísia Relevante : Kazu Karau Susu Been, Tribunal Absolve Eis Vise Ministru MAP ho Arguido Nain Tolu Seluk

Ministru Manuel Cárceres da Costa hateten, dala barak sosiedade sivíl inklui lider polítiku sira kritika servisu juis ho prokuradór la independente bainhira foti desizaun ba kazu ruma hodi anula kazu ida ninia prosesu la’ós tanba frakeza husi juis sira nia desizaun, maibé kauza ne’e mai husi investigasaun ne’ebé polisia no investigadór sira halo hasa’e ba ministériu públiku mak la aprezenta dadus la forte.

“Ema barak kritika katak, juis la independente, prokuradór sira la hala’o knaar ho di’ak. Ha’u rekuza akuzasaun sira ne’e. Juis ka prokuradór atu hatuur lia loos nia fundamentu maka investigasaun nia rezultadu. Se investigadór halo investigasaun la loos, prokuradór mós sei halo akuzasaun la di’ak, juis sei tesi kazu la di’ak, tanba kazu krime atu rezolve investigadór maka tenke forte,”  esplika Ministru Manuel Cárceres, ohin, iha ámbitu fó pose ba investigadór kriminál husi Polisia Sientífika Investigasaun Kriminál (PCIC-sigla portugés) na’in 30 iha edifísiu Ministériu Solidariedade Sosiál no Inkluzaun (MSSI), Caicoli, Dili.

Notísia Relevante : Kazu Oho Vera, Tribunál Absolve Arguidu Na’in Haat

Ministru ne’e  hatutan, knaar investigadór la’ós atu buka tuir ema nia sala, maibé investigadór ida hala’o servisu ho profisionál atu buka lia loos no justisa loloos atu tulun Ministériu Públiku no Juis sira rezolve problema hodi hatuur justisa ida ne’ebé loloos tuir lei bazeia ba natureza husi kazu hodi ema simu justisa ho laran luak.

“Investigasaun di’ak para bele ajuda ita nia prokuradór no ita nia juis sira tesi kazu ho loloos. Ho nune’e ita mak ita bele dezenvolve ita nia justisa,” hateten Manuel Cárceres.

Ministru Cárceres husu ba polisia no prokuradór inklui juis sira kontinua servisu hodi dezenvolve sistema judisiáriu iha Timor-Leste bele la’o ho di’ak liután.

Jornalista : Eugénio Pereira 

Editór       : Francisco Simões

 

HAKEREK NO HATÁN

Please enter your comment!
Please enter your name here