Eis Vise Ministru Agrikultura no Peska, Marcos da Cruz . Imajen/MAP.

DILI, 09 agostu 2019 (TATOLI) – Tribunal  Distritál Dili (TDD), ohin, foti desizaun finál hodi absolve arguido sira ne’ebé Ministériu Públiku (MP) akuza envolve iha kazu karau susu been.

Notísia Relevante : Tribunál Kontinua Halo Julgamentu Ba Kazu Karau Susu Been

Ministériu Públiku (MP) ne’ebé reprezenta hosi Prokuradór Jacinto Babo ho Prokuradóra Lidia Cardoso, akuza arguido Marcos da Crus nu’udar eis Vise Ministru Agrikultura no Peska (MAP) ho arguido na’in tolu seluk; arguida Regina da Costa, arguido Feliz da Costa ho Lourenço Fontes, nu’udar kargu xefia iha MAP envolve iha projetu sosa karau susu been ne’ebé fó prejuízu ba Estadu tanba Estadu lakon $650,675.00.

Projetu ne’ebé hala’o iha tinan 2014 ne’e ho objetivu atu sosa  fini karau susu been hamutuk 165 hodi distribui ba benefisiáriu sira iha Era ulu, Postu Administrativu Letefoho, Munisípiu Ermera ho Fuiloro, Munisípiu Lautem, maibé karau ne’e la mai to’o ohin loron.

Notísia Relevante : 31 Jullu, TDD Halo Leitura Akórdaun Ba Kazu Karau Susu Been

Ministériu Públiku iha nia akuzasaun finál, foin lalais ne’e, husu ba Tribunal atu hamonu sentensa prizaun efetivu tinan ualu (8) ba arguido sira, maibé finalmente, ohin, tribunal absolve arguido sira tanba  faktu la provadu.

Tuir Tribunal, antes lee sai desizaun ba kazu nee, iha faktu foun balu mak tribunal identifika, hanesan iha data konkretu arguido Marcos da Cruz antes iha nia deklarasaun ikus hatete katak iha momentu asina projetu orsamentu nee tuir Ministru Agrikultura altura ne’ebá Mariano “Assanami” Sabino nian orientasaun.

Faktu seluk mak arguido Lourenço Fontes, iha loron 24-29 Novembru 2014, loke konta bankária iha ANZ ba konta bankária arguido Ricardo Lay nia konta, maibé laiha koñesimentu hosi Governu.

Enkuantu kona-ba provas, tribunal haree katak, loos duni arguido sira la involve direita iha prosesu nee, maibé tanba nu’udar funsionáriu iha Ministériu kompetente iha responsabilidade servisu, entaun lao tuir desizaun ministru sira nian. Ho nune’e, Tribunal konsidera laiha intensaun atu fó prejuizu ba Estadu.

Tribunal hanoin hodi absolve arguido sira hosi krime sira ne’ebé antes Ministériu Públiku imputa ba sira.
Seluk, fali tribunal mós haree katak tanba prejuizu osan estadu ho montante $650,675.00, maka arguido na’in tolu, kompostu hosi arguida Regina da Costa, tenke selu indemnizasaun osan $30,000.00, Arguido Feliz da Costa, ($7.500.00) no arguido Lourenço Fontes ($70.000.00), restu arguido Ricardo Lay mak sei selu.

Ikus liu, depois lee sai provas, tribunal hato’o ba públiku katak desizaun ne’ebé tribunal halo ho imparsialidade, la haree ba asuntu polítiku, la haree ba informasaun mídia ou informasaun seluk, maibé nee bazeia ba prosesu investigasaun tribunal nian rasik tuir sistema jurídiku.

“Desizaun sira ne’ebé tribunal halo, la haree ba interese privadu, la haree ba polítiku, la haree ba informasaun mídia no seluk tan. Maibé, tribunal imparsiál atu fó justisa justu ba ema hotu, tanba nee ba arguido na’in hat nee tribunal absolve hotu,” afirma Juiz prezidente koletiva, Ana Paula Fonseca.

Audiénsia julgamentu arguido sira hetan asisténsia legal hosi Defensór Públiku, Marçal Marcarinhas, inklui advogadu privadu na’in tolu.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here