Tribunál Distritál Dili. Foto site tribunais.tl

DILI, 22 agostu 2019 (TATOLI) – Tribunál Distritál Dili (TDD), liuhusi juis koletivu Eusébio Xavier, Ana Paula, Zulmira Auxiliadora, deside absolve (konsidera inosente) arguidu na’in haat ne’ebé Ministériu Públiku (MP) akuza oho matebian Vera iha Kristu Rei to’o lori ba soe iha Subaun, Manatutu.

Notísia Relevante : Rezultadu Autópsia, Matebian Vera Hetan Taa Ho Sasán Kro’at

Arguidu sira ne’e kompostu husi Natalisto da Costa Ximenes, José Tete Gonçalves, Agostinho de Jesus no Nicolau da Costa.

Adelina Loubo reprezenta advogadu na’in haat seluk nu’udar defeza ba arguidu sira, ohin liu husi  WhatsApp ba TATOLI hateten ba kazu matebian Vera tribunál konsidera durante iha audiénsia julgamentu, iha produsaun ba provas nia laran, laiha faktu ne’ebé provadu hodi kondena arguidu sira.

Razaun seluk tribunál liberta sira mak laiha teste deoxyribonucleic acid (DNA) ne’ebé bele komprova katak kadaver (mate isin) ho identidade  matebian Vera. Tanba ne’e, laiha provas sufisiente ne’ebé bele hatudu katak kadaver la’ós matebian Vera.

Notísia Relevante : Kazu Oho Vera, MP Sujere Halo Inspesaun Lokál

Tuir tribunál, matebian Vera lakon dezde iha loron 02 jullu 2018 ate a data. Signifika mate-isin iha mortuariu la’ós matebian Vera nian. Tanba, polísia ho Ministériu Públiku (MP) mak iha responsabilidade másimu hodi halo investigasaun kona-ba kadaver ne’ebé hetan iha Subaun nee.

Nia dehan Ministériu Públiku (MP) liu husi  prokuradór António Tavares da Silva akuza arguidu sira ho krime omisídiu agravadu tuir artigu 139 hosi kódigu penál, krime destruisaun, okulta saun ka profanasaun, devér tuir artigu 224 kódigu penál, no krime arma branka tuir artigu 2 alínea B lei númeru 5/2017.

“Signifika akuzasaun husi MP ne’e la provadu, tanba ne’e mak arguidu sira hetan absolve,” salienta nia.

Nia mós esplika, maibé prosesu ne’e seidauk tránzitu ein-julgadu, signifika tribunál sei fó prazu loron 15 ba parte ne’ebé iha interese atu halo rekursu, kuandu la satisfás ho desizaun TDD.

Advogada ne’e observa durante alegasaun MP nian, defeza bele foti konkluzaun katak MP rasik mós sei dúvida atu husu kondenasaun ba arguidu sira. Parte MP la hato’o opozisaun ruma sobre faktu ne’e, signifika MP mós konkorda.

Nia  dehan iha mós alterasaun substansiál ba faktu ne’ebé tribunál hetan durante prosesu julgamentu tuir art 273 Kódigu Prosesu Penál (KPP) katak kuandu iha produsaun prova nia laran mosu faktu ne’ebé la tama iha, maibé iha interese ba desizaun no la hasa’e pena aplikavel nia limite másimu tuir rekerimentu tribunál fó hatene ba Ministériu Públiku no Defensór no kuandu sira ruma husu sira atu prepara sira nia pozisaun prosesuál.

“Depois desizaun ne’e tránzitu ein-julgadu mak husi parte ami sei halo partisipasaun ba investigadór sira kona-ba injustisa,” Advogada Adelina Loubo.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here