Logotipu PCIC

DILI, 23 agostu 2019 (TATOLI)-Ministru Justisa (MJ) Manuel Cárceres da Costa, hateten, governu mantein ho polítika hodi sosa uluk pistola hamutuk 50 ba Polisia Sientífika Investigasaun Kriminál (PCIC-sigla portugés).

Notísia Relevante : Governu Desidi Sosa Pistola Ba PCIC

Ministru Justisa, Manuel Cárceres da Costa. Imajen/Antonio Goncalves

Ministru Manuel Cárceres hateten, prosesu sosa pistola ne’e sei aprezenta ba Konsellu Ministru halo tiha rezolusaun hodi haree taxa importasaun sasán hirak ne’e.

“Agora iha ona Konsellu Ministru hein halo rezolusaun tanba de’it iha taxa importasaun kilat ne’e, ita nia lei Alfándega hatete katak, ita importa sasán ne’e tenke selu taxa husi valór importasaun ne’e, tanba ne’e presiza iha rezolusaun Konsellu Ministru para halo injesaun ba taxa,” informa Ministru Manuel Cárceres ba jornalista, ohin, hafoin fó pose ba investigadór kriminál PCIC nian iha salaun Ministériu Solidariedade Sosiál no Inkluzaun (MSSI), Caicoli Dili.

Notísia Relevante : Governu Aprova Pedidu Sosa Pistola Ba PCIC

Ministru dehan, orsamentu sosa pistola ne’e mai husi Orsamentu Jerál Estadu OJE (2019) ho montante dolar Amerikanu rihun atus ida.

Nia mós informa, PCIC mós agora daudaun iha ona mákina teste DNA ho kualidade di’ak liu no tuir planu iha tempu besik Governu Xina sei fó tan mákina modernu ida ba PCIC.

Iha fatin hanesan, Diretór PCIC, Vicente Fernandes Brito  dehan, prosesu sasa arma ba PCIC importante tebes hodi reforsa servisu PCIC halo investigasaun ba kazu krime sira.

“Prosesa sosa arma servisu sira ne’e hein rezolusaun governu nian. Tanba ha’u hanoin iha previzaun orsamentu ita bele sosa (pistola) 50,” dehan Vicente.

Kona-ba marka husi pistola ne’ebé atu sosa, Vicente dehan, nia parte la lembra, tanba prosesu ne’e governu maka halo kontratu direita ho kompañia ne’ebé manan konkursu.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here