Ministru Justisa, Manuel Cárceres da Costa. Imajen/Antonio Goncalves

DILI, 14 maiu 2019 (TATOLI)–VIII Governu Konstitusionál liuhusi desizaun Konsellu Ministru aprova ona pedidu PCIC hodi sosa pistola ba  membru Polícia Científica de Investigação Criminal (PCIC).

Ministru Justisa, Manuel Cárceres da Costa katak pedidu sosa pistola ne’e aprezenta hosi PCIC ba Ministériu Justisa no aprova iha Konsellu Ministru hodi halo ona prosesu tama ba aprovizionamentu, tan ne’e bele prevé osan sosa arma ne’e.

“Governu aprova ona pedidu sosa pistola. Agora avansa ona ba aprovizionamentu, tanba PCIC mós ema ida ba atu atua problema krime organizadu ne’e labele ba liman mamuk,” dehan Ministru Justisa ba jornalista sira hafoin partisipa iha aniversáriu PCIC ba dala V (15 maiu 2014-15 maiu 2019) iha salaun enkontru Ministériu Solidariedade Sosiál Inkluzaun (MSSI), ohin.

Nia dehan, molok aprova pedidu sosa pistola ne’e governu tetu hotu ona desizaun hodi halo mós kritériu rigorozu, tanba natureza servisu PCIC atu kombate problema krime oioin.

“Sira (PCIC) ne’e naran Polícia Científica de Investigação Criminal. Nia ba hasoru kriminozu nia ba liman tanan sé mak bele garante defeza no siguransa ba nia moris,” Cárceres kestiona.

Totál orsamentu atu sosa pistola, Ministru Manuel lakohi fó sai, tanba prosesu ne’e aprovizionamentu mak sei ba sosa tuir desizaun Konsellu Ministru.

Nia dehan, ba futuru karik membru PCIC uza arma la tuir regra dixiplina hodi komete iha erru ruma sei investiga no hasai hosi servisu. “Sé mak viola regra tama kadeia,” dehan Ministru ne’e ho hamnasa.

Antes ne’e, membru PCIC sira tuir ona formasaun utiliza arma iha eskola Polísia Judisiáriu Portugal.

Jornalista: Eugénio Pereira

Editór: Xisto Freitas

HAKEREK NO HATÁN

Please enter your comment!
Please enter your name here