Ministru Defeza no Ministru Interiór Interinu, Filomeno da Paixão de Jesus ko’alia ho Prezidente Repúblika, Francisco Guterres Lú Olo no Primeiru-Ministru, Taur Matan Ruak, hafoin simu pose iha Palásiu Prezidensiál, Bairru-Pité, foin lalais.

DILI, 12 juñu 2019 (TATOLI)—Hafoin mosu ideia pro-kontra kona-ba polítika sosa pistola ba Polícia Científica de Investigação Criminal (PCIC), ikus mai governu liuhusi Konsellu Ministru kontinua mantein desizaun polítika sosa nafatin pistola ba PCIC.

Ministru Defeza no Ministru Interiór Interinu, Filomeno da Paixão de Jesus esplika, governu aseita ho ideia públiku inklui Xefe Estadu Maior Jenerál Lere Anan Timur kontra desizaun ne’e, maibé Governu mós konsidera serbisu PCIC prioridade hodi investiga kazu krime presiza iha pistola atu fasilita membru PCIC.

“Buat ne’e (sosa pistola) aprova tiha ona iha tinan ida ka rua ba kotuk para PCIC lori pistola. Iha duni opiniaun husi Xefe Estadu Maior Jenerál Lere Anan Timur nian kona-ba preokupasaun jenerál nian ha’u kompriende, tanba ita rona dehan kilat ilegál sira balun lori tama fali mai, ita nia F-FDTL no PNTL balun kaer pistola mós kontrola aan seidauk bele. Maibé, Estadu mós konkorda ona PCIC kaer kilat depois halo investigasaun ba kazu sofistifikadu (krime avansadu),” dehan Filomeno ba jornalista iha Palásiu Governu, Dili, ohin.

Nia dehan, PCIC maka tenki tau regulamentu disiplina atu kuidadu lori pistola arbiru, tanba sei iha regra.

Filomeno hatutan, PCIC rasik mós treina ona atu uza kilat, tanba ne’e Estadu sei halo kontrolu ho regra ne’ebé forte.

Antes ne’e, PCIC aprezenta proposta ba Ministériu Justisa hodi prevee osan hamutuk mil $100 ba sosa pistola ne’e.

 

Jornalista: Eugénio Pereira

Editór: Xisto Freitas

1 KOMENTÁRIU

HAKEREK NO HATÁN

Please enter your comment!
Please enter your name here