Prezidente AJTL, David Hugo, fotografu timoroan husi TLPU, Lirio Fonseca ho Prezidente CI, Vírgilio da Silva Guterres, sai oradór iha komemorasaun loron mundíal fotografia ne'ebé organiza husi Konsellu Imprensa (CI-sigla portugés), kinta (22/08/2019). Imajen/Osória A.Marques

DILI, 22 agostu 2019 (TATOLI)-Konsellu Imprensa (CI-sigla portugés), ohin, komemora loron mundiál fotografia ho tema prinsipál “Papél Fotografia Iha Rezisténsia no Dezenvolvimentu Timor-Leste”.

Notísia Relevante : KI Komemora Loron Mundiál Liberdade Imprensa Ho Marsa

Loron fotografia ne’e, tinan-tinan, mundu fotografia jornalizmu komemora iha loron 19 agostu, no ba tinan ne’e, primeira vez CI komemora hodi fó onra ba  obra fotógrafu timoroan sira ho mós fotógrafu internasionál sira ne’ebé hato’o mensajen jornalizmu liuhusi foto ba mundu kona-ba Timor nia luta no sofrimentu.

Komemorasaun loron mundiál fotografia ne’ebé CI organiza liuhusi semináriu ne’e hala’o iha Otél Garden Beach hodi aprezenta oradór prinsipál mak Prezidente Asosiasaun Jornalista Timor-Leste (AJTL), David Hugo, fotógrafu seniór husi Timor-Leste Press Union (TLPU), Lirio da Fonseca, Prezidente CI, Virgilio da Silva Guterres  ho nia audiénsia mai husi jornalista timoroan iha mídia nasionál  (tv, radio, online no jornais), inklui estudante komunikasaun sosiál husi Universidade Nasionál Timor Lorosa’e (UNTL) ho UNITAL (Universidade Orientál).

Notísia Relevante : KI ho LBH Pers Aseita Promove Advokasia Ba Liberdade Imprensa

Diretora Ezekutivu CI, Ana Teresa Sequeira, iha nia breve palavra ba abertura serimónia ne’e hateten, CI sente ksolok tebes, tanba tinan ida ne’e, bele iha oportunidade atu selebra loron mundiál fotografia hamutuk ho fotógrafu timoroan  sira.

Eis jornalista husi Radio Timor Kmanek  (RTK) ne’e hatutan, iha era dijitál ne’e, fotógrafu sai profisaun ne’ebé ema barak gosta, tanba ne’e, ema hanoin buat ne’e fasil. Maibé, la’ós nune’e, tanba dala barak fotógrafu ida tenke sakrifika ninia-aan iha funu laran atu hetan imajen di’ak ida ou hetan agresaun fíziku ruma tan-de’it atu hetan imajen úniku iha demonstrasaun ida nia laran.

Notiísia Relevante : Horta Apoia Inisiativa CI Atu Define Loron Nasionál Liberdade Imprensa

“Bainhira ita ko’alia kona-ba jornalizmu, ne’e la’ós ko’alia kona-ba gosta, maibé kona-ba responsabilidade ida atu uza lingua vizuál hodi hato’o mensajen ba públiku. No ida ne’e mós rekere kumprimentu ida ne’ebé tenke hakesi-aan nafatin ba Kode Étika Jornalistika,” hateten Ana Sequeira.

Nia mensiona mós katak, iha Timor-Leste, étika ne’ebé regulariza foto jornalizmu  hetan iha Kode Étika Jornalistiku (KEJ)  ne’ebé CI aprova iha Janeiru 2017. Iha artigu 10 Kode Étika Jornalistika husu jornalista no fotógrafu sira atu ‘evita publika, imajen, lian ne’ebé tranzmite sadizmu ka violénsia hasoru ema ka balada ne’ebé iha natureza hakanek públiku nia sentimentu.’

Nune’e mós, Ana Siqueira hatutan, iha artigu 4 Kode Étika Jornalistika ne’e husu jornalista no fotógrafu sira atu sempre hetan informasaun, dokumentu no imajen ho forma legal no profisionál.

“Artigu rua ne’e fó hanoin mai ita katak, tantu jornalista no mós fotógrafu ne’e profisaun ida, ne’ebé mak iha responsabilidade ba públiku no ba sira nia servisu,” tenik Ana Sequeira.

Iha momentu kmanek ida ne’e, CI hato’o parabens b fotógrafu Timoroan sira hotu ne’ebé mak fó sira nia-aan atu kontribui hodi loke públiku nia asesu ba informasaun liuhusi sira nia obra jornalizmu.

Jornalista : Osória A.Marques 

Editór      : Francisco Simões

HAKEREK NO HATÁN

Please enter your comment!
Please enter your name here