Konsellu Imprensa hamutuk ho komunidade jornalista no estudante universitáriu, ohin hala’o marsa hosi Rotunda Francisco Xavier do Amaral to’o terminál Bekora hodi komemora loron mundiál liberdade imprensa. Imajen António Gonçalves

DILI, 3 maiu 2019 (TATOLI) – Konsellu Imprensa (KI), ohin hamutuk ho komunidade jornalista no estudante universitáriu komemora loron mundiál liberdade imprensa ho marsa hosi Rotunda Francisco Xavier do Amaral to’o Terminál Bekora.

Prezidenti KI, Virgílio da Silva Guterres, hateten marsa ne’ebé hala’o hahú desde 2000 ne’ebé realiza husi Asosiasaun Jornalista Timor-Leste (AJTL) to’o mai involve tan Timor-Leste Press Union (TLPU) no sindikatu sira.

Prezidente KI, Virgilio Guterres. Imajen António Gonçalves

“Objetivu marsa ne’e atu hanoin hikas fali jornalista internasionál sira ne’e mate bainhira hala’o servisu jurnalístiku iha Timor, tanba profisaun jurnalístiku hodi haruka ema mai buka informasaun iha ita nia rain, ikus mai tenke mate iha ita nia rain, entaun tinan-tinan iha loron 3 maiu, komemora”, katak Virgílio da Silva Guterres iha ámbitu selebrasaun.

Biban ne’e, jornalista senior ne’e afirma komemorasaun ne’e ezije ba Estadu no Governu atu tau matan ba servisu jornalista, li-liu fó asesu ba jornalista sira hodi bele hetan informasaun ne’ebé di’ak.

Biban ne’e Sekretáriu Jerál Timor-Leste Press Union (TLPU), Manuel Pinto, realsa Governu no KI presiza define loron ida nu’udar loron nasionál ba liberdade imprensa.

“Tinan-tinan labele komemora de’it loron liberdade imprensa iha loron mundiál, maibé pelumenus Timor nu’udar Nasaun soberanu presiza define mós loron liberdade imprensa nu’udar loron nasionál rasik”, dehan Manuel Pinto.

Manuel Pinto husu atu instituisaun Estadu kria regulamentu sira liga ho orgaun komunikasaun sosiál nian, katak to’o ona tempu atu konsensializa proprietáriu mídia sira atu trata jornalista ho dignu.

Jornalista timoroan, Raimundo Sarmento Fraga, afirma Timor-Leste iha lei rasik regula liberdade imprensa no liberdade espresaun ne’ebé iha KRDTL artigu 40 no 41 no mós lei komunikasaun sosiál númeru 4/2015.

“Liberdade imprensa sai nu’udar matan dalan ida atu bele promove Demokrasia iha Timor-Leste. Ita labele hateten liberdade imprensa iha Timor-Leste la la’o di’ak, ne’e lae, balu sente katak di’ak ona, iha parte balu maka sei iha intervensaun polítika husi orgaun Estado balu”, dehan Fraga.

Konsellu Imprensa hamutuk ho komunidade jornalista no estudante universitáriu, ohin hala’o marsa hosi Rotunda Francisco Xavier do Amaral to’o terminál Bekora hodi komemora loron mundiál liberdade imprensa. Imajen António Gonçalves

Jornalista timoroan ne’e espera liberdade imprensa iha Timor-Leste la’o di’ak liu tan.

Entretantu, istorikamente iha 26 agustu 1999, jornalista, Bernadino Guterres, mate bainhira hala’o nia serbisu. Iha 21 setembru, jornalista, Sander Thoenes, husi Olanda hetan oho iha Bekora.

Tuir mai, jornalista Asia Press husi Indonézia, Agus Mulyawan, mós mate iha 25 setembru 1999 iha Lospalos.

Iha 16 outubru 1975, jornalista Greg Shackleton, Tony Stewart, Brian Peters, Malcolm Rennie no Gary Cunningham mós mate iha Balibó.

Sander Robert Thones

Iha 12 novembru 1991, Kamal Bamadhaj, jornalista akadémiku ida, orijen Malázia ne’ebé eskola iha Austrália mós mate tanba kauza husi situasaun Timor nian iha tempu ne’ebá.

Iha 8 Dezembru 1975, jornalista Freelance husi Austrália, Roger East, hetan oho husi militár Indonézia.

Jornalista: Antónia Gusmão

Editora: Rita Almeida

HAKEREK NO HATÁN

Please enter your comment!
Please enter your name here