Ministru Justisa, Manuel Cárceres da Costa. Imajen/Antonio Goncalves

DILI, 16 agostu 2019 (TATOLI)-Husi Maiu to’o Jullu 2019, Servisu Nasionál Kadastru (SNC-sigla Portugés) halo ona rejistrasaun ba rai komunidade hamutuk rihun 280 resin iha territóriu.

Notísia Relevante : Rede Ba Rai Rekomenda Ba Governu Halo Kontrolu ho Rigor Ba SNC

Ministru Justisa, Manuel Cárceres da Costa,   ba Ajénsia TATOLI  hafoin enkontru trimestral  ba dala-22 ho diresaun SNC, ohin, hateten,  tuir previzaun to’o dezembru 2019 sei halo rejista ba rai komunidade hamutuk rihun 306 iha territóriu.

Notísia Relevante : Relatóriu Peskiza Rede Ba Rai: SNC Tenke Hapara Servisu

“Sira aprezenta relatóriu trimestral ida  to’o iha loron 31jullu no agora ita to’o ona loron 16 agostu, sira halo rejista tan ona purvolta rihun lima ona,” informa Ministru Justisa iha edifísiu SNC,  Kintál Boot, Dili.

Husi relatóriu ne’e,  identifika mós  kazu disputa rai entre komunidade sira durante prosesu levantamentu ne’e maibé ekipa SNC konsege halo  aproximasaun hodi rezolve ona kazu balun.

Notísia Relevante : SNC Nakloke Simu Auditória

Manuel Cárceres da Costa, tenik, husi total númeru levantamentu dadus ne’ebé iha rejista de’it persentajen ki’ik liu maka tama iha kategoria disputa.

“Kazu sira ne’ebé maka la-konsege rezolve pasa ba komisaun de terras ne’ebé maka ita sei harii iha tinan ida ne’e,” Manuel Cárceres hateten.

Tuir planu relatóriu ne’e,  Ministru Justisa sei entrega ba Primeiru-Ministru, Taur Matan Ruak iha tempu badak. Projetu levantamentu rai husi SNC ne’e sei termina iha loron 31 dezembru 2019.

Jornalista : Agapito dos Santos

Editór       : Francisco Simões

HAKEREK NO HATÁN

Please enter your comment!
Please enter your name here