Lansamentu relatóriu husi Rede Ba Rai. Foto: Rede Ba Rai

DILI, 18 juñu 2019 (TATOLI) – Sekretariadu Rede ba Rai ne’ebé hanesan rede servisu ba asuntu Rai no Hela Fatin iha Timor-Leste, lansa relatóriu rezultadu peskiza ida kona-ba rejistrasaun rai husi SNC (Sistema Nasionál Kadastru-sigla portugés). Iha relatóriu ne’e husu ba SNC kataj presiza hapara levantamentu dadus tanba durante ne’e hamosu problema ba komunidade.

Koordenadór Nasionál Rede ba Rai, Pedrito Vieira konsidera problema mosu tanba informasaun ba públiku menus no la-efetivu, nune’e halo komunidade barak la-komprende impaktu jurídiku husi prosesu sukat rai.

“Ohin ami relata ona rezultadu peskiza no buat barak la-tuir lei ne’ebé mak iha, SNC halo no ho ida ne’e mak iha rekomendasaun ne’ebé ami lansa katak di’ak liu SNC tenke hapara servisu ne’e,” nia tenik ba jornalista sira iha Salaun João Paulo II Comoro, tersa ne’e.

Nune’e, nia husu entidade relevante sira hodi halo investigasaun ba SNC, relasiona ho rezultadu peskiza ne’ebé laiha transparénsia no responsabilidade, no mós kontra lei balun.

Nia mós observa eventu lansamentu relatóriu ohin importante maibé laiha partisipasaun husi parte Governu hanesan Ministériu Justisa inklui Diresaun Terras no Propriedade, enkuantu partisipante sira presiza informasaun husi Governu bazeia ba rezultadu peskiza ne’e.

“Sira (Governu) la-kohi partisipa hanesan tristeza boot mai ami, tanba ita ko’alia vida nasaun no populasaun ne’ebé durante ne’e enfrenta situasaun disputa rai, maibé parte kompetente husi Governu la-bele partisipa, hatudu katak ita laiha vontade di’ak atu rezolve povu nia problema no diretu fundamentál liga ba disputa rai,” hateten koordenadór ne’e.

Ekipa Rede ba Rai rasik halo ona peskiza durante tinan ida hodi prodús relatóriu relasiona ho asuntu Rai, espesífiku liu ba servisu SNC ba sukat rai, ho analiza ne’ebé mak forte tebes husi aspetu ho baze legál no mós analiza liu-hosi estudu ba kazu rai iha munisípiu Covalima no munisípiu seluk inklui Rejiaun Administrativa Espesiál Oe-Cusse Ambeno (RAEOA). Nune’e, liu-hosi peskiza ne’e bele relata ba situasaun reál ba públiku.

Iha fatin hanesan, Peskizadór La’o Hamutuk ba asuntu Agrikultura no Rai, Mariano Ferreira ne’ebé envolve mós ba peskiza ne’e hateten, durante hala’o peskiza ne’e, nia parte husu ona ba komunidade sira maibé sira la-hatene kona-ba asuntu ne’e, tanba ne’e sira lamenta tanba laiha informasaun no derrepente ekipa husi SNC mai sukat rai.

“Ami entrevista Autoridade Polísia Komunitáriu, Defensór Públiku no Prokuradór Suai tanba ami foti munisípiu Suai hanesan estudu ba kazu ne’ebé to’o agora sira seidauk identifika konflitu ruma liga ba prosesu sukat rai, maibé ami-nia análiza mak hanoin karik iha futuru bele akontese konflitu,” katak nia.

Nia mós dehan dala-ruma iha komunidade iha uma kain haat mak hela iha rai ida de’it, maibé iha prosesu rejistu tau ema ida nia naran entaun ema ida de’it mak iha diretu ba rai ne’e no sira seluk bele sai problema tuir prosesu legál.

Iha aprezentasaun relatóriu ne’e mós hatudu katak SNC viola rekizitu lubun ida ne’ebé Governu rasik estabelese ona, ne’ebé hahú rejistu rai ne’e bazeia Dekretu-Lei artigu 27 no mós Diploma Ministeriál balun no ikus mai Parlamentu Nasionál aprova no Prezidente Repúblika promulga hanesan Lei 13/2017.  Iha lei ne’e sofre alterasaun maibé SNC rasik la-iha koñesimentu.

Jornalista       : Julia Chatarina

Editór             : Rafy Belo

HAKEREK NO HATÁN

Please enter your comment!
Please enter your name here