Edifisiu Ministériu Justisa. Imajen/Egas Cristovão

DILI, 14 agostu 2019 (TATOLI)—Depois fulan hirak nia laran tratamentu Billete Identidade (BI) iha Diresaun Nasionál Rejistu no Notariadu (DNRN) la duun funsiona ho di’ak tanba la iha tinta impresaun, maibé ohin loron ba oin, DNRN normaliza hikas ona atu atende públiku ne’ebé presiza trata BI.

Notísia Relevante : Sinar Media Sai Fornesedór Blanku BI

Diretór Jerál Serbisu Rejistu no Notariadu, Ministériu Justisa, Crisogno da Costa  Neto, informa, atendimentu públiku ba BI daudaun ne’e lao normal hikas iha territóriu hafoin Kompañia Sinar Media  fornese  ona tinta  ba diresaun hodi apoiu prosesu impresaun BI ba sidadaun.

“Iha loron hirak liu ba Sinar Media fornese ona ribbon ka tinta atu imprime kartaun ne’e no ami fahe tiha ona ba konservatóriu Munisípiu sira hanesan Liquiça, Aileu, Manatuto,” informa Diretór Jerál ne’e ba Ajénsia TATOLI, ohin, iha ninia servisu fatin, Bebora, Dili.

Notísia Relevante : Ministru Cárceres Orienta Ona DNRN Sosa Lalais Blanku BI

Prosesu atendimentu BI iha munisípiu sira hahú lao normal, maibé iha Munisípiu Dili maka sei atraza tanba mákina empressora naran  fargo maka daudaun ne’e sei avaria hela.

“Dili maka ita sei hasoru difikuldade ho mákina ne’e tanba iha  ida de’it, maibé atu atende urjente iha Dili ami rekomenda ba konservatóriu sira besik iha  Munisípiu Liquiça, Ermera, Aileu no Manatuto hodi fó atendimentu,” Crisogno da costa Neto tenik.

Kona-ba mákina empressora fargo  ne’ebé avaria, Diretór ne’e esplika  Ministériu Justisa  asina ona kontratu ho kompañia Sagas  hodi fornese tan mákina foun  hamutuk 12  ba DNRN iha tempu badak.

Diretór ne’e garante ho prezensa mákina foun ne’ebé sosa prosesu sei re-ativa prosesu atendimentu BI iha Dili ho di’ak liután.

Ba estoke blanku BI, Diretór ne’e konfirma daudaun ne’e sei iha estoke hamutuk 54.400 ne’ebé antes ne’e hetan apoiu hosi kooperasaun Nasaun Afrikanu ho lian Portugés  (PALOP-sigla portugés).

Mezmu sei iha estoke, maibé  Governu mós  asina  tan  kontratu ho kompañia Sinar Media hodi fornese estoke  blanku BI  55.000  ba diresaun ne’e antes fin agostu 2019.

Entretantu, daudaun ne’e kompañia Sinar Media fornese ona ribbon ka tinta ba diresaun hamutuk unidade 95.

Jornalista : Agapito dos Santos

Editór       : Francisco Simões

HAKEREK NO HATÁN

Please enter your comment!
Please enter your name here