Diretor Diresaun Nasional Rejistu no Notariadu, João Fernando Martins Borges. Imajen/Antonio Goncalves

DILI, 18 jullu 2019 (TATOLI)-Hafoin liuhusi konkursu públiku ba prosesu fornesimentu blanku Billete Identidade (BI)  ba Diresaun Nasionál Rejistu Notariadu (DNRN), Ministériu Justisa, ikus mai to’o iha nia faze finál, kompañia Sinar Media mak prienxe rekizitu no iha direitu legal nu’udar fornesedór blanku BI purvolta rihun 55 iha tinan 2019.

Diretór DNRN, João Fernando Martins Borges,  informa, mezmu prosesu konkursu públiku ne’e define ona Sinar Media mak manan, maibé nia parte seidauk hatene kontratu serbisu nian hala’o ona ka seidauk.

Ba Ajénsia TATOLI, iha ninia serbisu fatin, Bebora, Dili kuarta (17/07/2019), Diretór João Fernando Martins Borges, informa, blanku BI ne’e sei distribui ba munisípiu neen  (6) hanesan Dili, Baucau, Bobonaro, Viqueque, Liquiça, Aileu ho Rejiaun Administrativu Espesiál Oe-Cusse Ambeno (RAOEA).

DNRN mós propoin atu sosa mákina emisaun BI hamutuk ualu hodi substitui tanba mákina rua iha diresaun nasionál aat ona, nune’e mós iha Munisípiu Baucau, Lautem ho Viqueque mákina la funsiona.

“Fargo ka mákina emisaun  iha munisípiu hotu iha, maibé iha Baucau, Lautem no Viqueque at tanba ne’e presiza mákina foun hodi substitui,” hateten João Fernando Martins Borges.

Tenderizasaun  hodi sosa mákina emisaun ne’e, nia esplika, diresaun aprovizionamentu halo ona akizisaun hodi loke tenderizasaun ba públiku hodi sosa mákina foun tanba mákina uzadu ne’ebé daudaun  ninia estoke laiha ona merkadu.

DNRN  kontinua fó atendimentu ba sidadaun ne’ebé hakarak trata BI ho karakter urjénsia atu trata pasaporte  hodi servisu iha rai li’ur no asuntu seluk tan tanba iha munisípiu balun sei iha estoke blanku BI.

Notísia Relevante :Blanku BI Iha Ona Aprovizionamentu, Ministru Cárceres Orienta Ona DNRN Sosa Lalais Blanku BI

Jornalista          : Agapito dos Santos

Editór                : Francisco Simões

HAKEREK NO HATÁN

Please enter your comment!
Please enter your name here