Tribunal Distritál Dili.

DILI, 07 jullu 2019 (TATOLI) –Tribunal Distritál Dili (TDD), sesta (05/07/2019), kontinua halo audiénsia julgamentu ba kazu karau susu been ne’ebé mak deskonfia envolve husi arguido na’in haat (4) ho inisiál MC, LBF, RCH ho FO.

Prosesu julgamentu, Ministériu Públiku  (MP) rona fila-fali arguido MC nia deklarasaun hodi haforsa MP nia alegasaun no husu atu halo rekursu ba Tribunal.

Perante Juiz koletivu, Julmiati Freitas, Ana Paula, Euzebio Xavier nia oin,  Arguido MC konfesa ba Tribunál katak, iha tinan 2014 la iha enkontru  ho ekipa juri molok halo pagamentu ba projetu karau susu been.

Momentu ne’ebá,  iha 16 to’o 29 Novembru 2014, ha’u la enkontru ho sira (juri) kona ba karau susu been nee rasik,” deklara arguido MC iha sala audiénsia julgamentu.

Bainhira, MP konfirma kona ba autorizasaun selu pagamentu, arguido MC konfesa katak nunka fóorientasaun ba ema ruma atu halo pagamentu, nune’e mós nia (arguido-red) la haruka testemuña asina dokumentu refere.

Rona tiha arguido MC, Tribunál adia julgamentu ba iha semana oin hodi halo alegasaun final.

Antes ne’e, sasin JAS nu’udar ofisial aprovizionamentu Finansa  iha Ministériu Agrikultura no Peska  deklara katak, arguido na’in  haat (4) la involve  desizaun  ba kompañiaNova Breeding and Trading Lda.

Tuir sasin katak, arguido na’in  4 la involve  desizaun hodi deside  kompañia Nova Breeding and Trading Lda  mak vensedór ba projetu karau susu been.

Sasin JAS  iha momentu ne’ebánia rasik hanesan membru no nia mak halo pasa revista dokumentu kompañia sira hafoin hatama ba ekipa juri.

MP alega arguido MC, LBF, RCH, FO   komete krime partisipasaun ekonomia  ne’ebéprevistu iha artigu 299 kódigu penal.

Arguido LBF, RCH, FO, iha konkursu ba krime falsifikasaun dokumentu ne’ebéprevistu iha artigu 303 kódigu penal. Tanba arguido sira halo kontratu ho  kompañia Nova Breeding and Trading sosa fini ba karau susu ben, hamutuk 165 husi Australia hodi distribui ba benefisiáriu iha Eraulu, Sub Distritu Lete Foho, Munisípiu Ermera no Fuiloro, Munisípiu Lautem ho montante $660,000.00.

Iha audiénsia julgamentu ne’e,  MP reprezenta husi prokuradór Jacinto Babo, Rogerio Viegas, arguido sira hetan asisténsia legal husi Advogadu Privadu no Defensor Públiku.

Jornalista   : Domingos Piedade Freitas

Editór         : Francisco Simões

HAKEREK NO HATÁN

Please enter your comment!
Please enter your name here