Tribunal Distritál Dili.

DILI, 16 jullu 2019 (TATOLI) – Tuir ajenda julgamentu ba kazu karau susu been, iha loron 31 jullu 2019,  Tribunál Distritál Dili (TDD) sei halo leitura akórdaun ba kazu refere ne’ebé deskonfia envolve arguido MC, FC ho LB.

Alegasaun Ministériu Públiku (MP), semana kotuk liu ba,  solista ba tribunál primeira instánsia atu aplika pena adekuadu ba arguido ameasa prizaun tinan ualu (8) no selu indemnizasaun ba Estadu hamutuk $785,895.00 tanba faktu sira ne’ebé konsta iha akuzasaun provadu hotu kedas.

Governu liuhusi Ministériu Agrikultura no Peska  (MAP) selebra kontratu ho kampaña Nova Breding Trading Unipesoál, husu osan ho montante boot ba estadu atu sosa fini karau susu been, maibé ikus mai karau laiha.

“Ministériu Públiku konsidera faktu sira nee privadu hotu kedas, tanba realidade kontratu osan boot, karau laiha, inklui mós hahán ba karau sira nee mós laiha,” deklara reprezenta MP, Prokuradór Jacinto Babo, iha sala audiénsia julgamentu, Sesta, foin lalais nee.

Prokuradór Jacinto Babo, afirma katak, Ministériu Públiku laiha duvida husu prizaun tinan ualu (8) ba arguido  na’in tolu, tanba   prova ho forma konsumada ba krime partisipasaun ekonomia de negósiu no krime falsifikasaun dokumentu.

Antes nee, arguido MC akuzadu ba krime Partisipasaun Ekonomia, maibé MP altera fila fali ba krime Administrasaun Danoza tanba iha altura lao tuir de’it orden substituisaun nu’udar Ministru Agrikultór, hodi asina de’it dokumentu komprovativu.

Iha parte seluk mosu kontráriu hanoin husi arguido sira nia defeza ne’ebé lidera husi Advogadu Marçal Marcarinhas, katak arguido sira ba kazu ida nee e fasilita dokumentu tanba kumpre orden lideransa.

Defeza klarifika katak, bainhira osan sira nee aprova husi parlamentu katak deside atu sosa karau nee sira laiha kompeténsia ona, tanba osan nee ba hotu kompañia no ema ne’ebé mak responsabilidade nee mak arguido ida ne’ebé mate tiha ona. Tanba nee, defeza sira nia parte laiha dúvida husu ba tribunal atu absolve arguido sira husi krime ne’ebé MP inputa ba.

Rona tiha akuzasaun nee tribunal deside adia fila fali ba loron 31 fulan nee, iha  tuku 02:00 OTL  hodi rona desizaun ikus.

Kronolojia autos husi MP

Iha fulan Fevereiru tinan 2014,  AA nu’udar Xefe Departamentu produsaun animal iha diresaun no veterináriu iha MAP, prepara proposta sosa fini karau susu been hamutuk 165 husi Australia hodi distribui ba benefisiáriu iha Era Ulo, Sub-Distritu Lete Foho, Munisípiu Ermera ho benefisiáriu iha Fuiloro, Munisípiu Lautem ho orsamentu $660.000.00.

Bainhira prepara tiha proposta refere iha leten, proposta ida nee entrega ba CCV nu’udar Diretór Nasionál Pekuária no Veterinária hodi submete ba arguido LBF.

Bainhira aprova proposta orsamentu ba sosa fini karau susu been, iha 25 fulan Fevereiru tinan 2014, proposta sosa fini Karau susu been hetan aprovasaun husi arguido LBF.

Iha loron hanesan 31 Jullu tinan 2014, Ministru Agrikultura no Peska (MAP) Mariano Asanami Sabino, ne’ebé reprezenta MAP, asina akordu ho kompañia Nova Breding Trading unipesoal ne’ebé reprezenta husi arguido MRL nu’udar Diretór kompañia.

Iha kontratu determina katak kompañia sei hatama Karau hamutuk 165, hahú husi loron 31 Jullu tinan 2014 too 31 fulan Outubru tinan 2014.

Iha tinan ne’ebé determinadu, 31 fulan Outubru tinan 2014, kompañia Nova Breding Trading seidauk hatama fini Karau susu been tuir kontratu.

Maibé, iha loron 13 fulan Novembru tinan 2014, kompañia halo ona invoice falsu no hato’o ba MAP liuhusi departamentu lojistiku MAP nian, katak karau susu been hatama ona ba MAP no husu halo inspesaun ba karau susu been no mós prosesu pagamentu ba kompañia ne’ebé tuir loloos labele, tanba karau susu been seidauk hatama husi kompañia ba MAP.

Iha loron 19 fulan Novembru 2014, arguido FOGC hatún despaxu ba nia sub-ordináriu, Julio Inacio Viegas prepara ba inspesaun rekerimentu. Iha loron nee kedas Julio Inácio Viegas preparadu dokumentu resebimentu no inspesaun no hato’o ba arguido RCH hodi halo aprovasaun ne’ebé la korresponde ho realidade katak karau susu been seidauk hatama.

Arguido RCH aprova tiha dokumentu rekerimentu no inspesaun, Aquildis da Silva prepara kedas pedidu pagamentu ba kompañia ho montante $659.175.00 ne’ebé hetan aprovasaun husi arguido LBF.

Iha loron 24 fulan Novembru tinan 2014, pedidu pagamentu iha 109 hein ultima aprovasaun husi arguido MC ne’ebé ezerse nia funsaun nu’udar interinu ba ministériu MAP iha tempu ne’ebá mézmu arguido hatene katak Karau susu been seidauk simu husi kompañia. Maibé arguido aprova pedidu pagamentu hodi realiza pagamentu ba kompañia ne’ebé la korresponde ho realidade.

Arguido MRL bainhira asina kontratu nia hatene katak iha kapasidade atu hatama Karau susu been 165 maibé karau seidauk tama, arguido lori dokumentu invoice ho DO falsu no bosok ka lohi katak karau simu ona husi MAP no husu pagamentu ba arguido nia kompañia.

Audiénsia julgamentu nee prezide husi juis koletivu, Ana Paula Fonseca, Juiza Julmira Auxliadora, juis Eusebio Xavier, Ministériu Públiku reprezenta husi prokuradór Jacinto Babo ho Lidia Cardoso, arguido sira hetan asisténsia legal husi Defensor Públiku, Marçal Marcarinhas, inklui advogadu privadu na’in ida.

Jornalista      : Domingos Piedade Freitas

Editór                : Francisco Simões

HAKEREK NO HATÁN

Please enter your comment!
Please enter your name here