Logotipu Komisaun Anti Korrupsaun (CAC-sigla Portugés).

DILI, 08 agostu 2019 (TATOLI) – Vizita surpreza Komisaun Anti Korrupsaun (CAC-sigla portugés) ba instituisaun estadu nian balun, foin lalais ne’e, konsege deteta prátika irregularidade iha instituisaun lubun ne’e.

Notísia Relevante :  KAK Loke Investigasaun ba Kazu Indikasaun Korrupsaun 40-Resin

Adjuntu KAK, Luis de Oliveira Sampaio.

Iha jornada KAK nian ne’ebé lidera hosi Komisáriu KAK, Sergio Hornay, halo ona levantamentu no vizita surpreza ba instituisaun sira estadu nian hanesan Diresaun Nasionál Transporte no Terrestre (DNTT), AIFAESA.IP (Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku), Aeroportu Dili, ho Servisu Alfándega iha Dili ho mós iha Fronteira Batugade ho Salele.

Adjuntu Komisáriu KAK, Luis de Oliveira Sampaio informa, vizita surpreza KAK nian ne’e konsege deteta irregularidade balun ne’ebé mak la promove boa governasaun.

Notísia Relevante : KAK Iha Prioridade Haat Ba 2019

Ba Ajénsia TATOLI, ohin, iha Otél Timor, Dili,  Adjuntu Komisáriu KAK, Luis de oliveira Sampaio, hateten, irregularidade balun kona-ba osan. Ezemplu, osan balun ne’ebé ema selu ba alfándega la tama ba Estadu mas hela de’it iha Alfándega.

“Ami haree hanesan estrañu no iha poténsia bele hamosu tentativa utiliza sala osan tanba fulan ida tiha mak transfere ba iha banku”,  hateten Luis Sampaio.

Infrasaun seluk ne’ebé mak KAK deteta iha DNTT, hateten Luis Sampaio, mak prosesu ba tratamentu blanku nian laiha, ba iha fronteira ninian mákina raiu-X hodi scan material sensitivu ruma avaria tiha ona. Tanba ne’e, KAK rekomenda ba instituisaun estadu sira nee atu halo jestaun ne’ebé mak di’ak.

“Se lae, KAK kontinua monitoriza no presiza hatene tanba saida mak la la’o no la funsiona,” tenik Luis Oliveira Sampaio.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here