DILI, (TATOLI) – Komisaun Anti Korrupsaun (KAK) sei fó prioridade ba área importante haat hodi dezenvolve instituisaun ba prevensaun no kombate korrupsaun iha tinan ne’e.
“Prioridade haat sei implementa iha tinan ne’e maka dezenvolve institusionál hodi hametin instituisaun ne’e atu sai institituisaun ida tuir atribuisaun kompoténsia maka lei fó ba komisaun”, dehan Komisáriu KAK, Sergio Hornay, ba Tatoli iha Sentru Konvensaun Dili, sábadu ne’e.
Sergio Hornay hatete sei halo mós formasaun no kapasitasaun ba investigadór no espesialista KAK, halo avaliasaun ba polítika prevensaun korrupsaun tuir rekomendasaun Konvensaun Nasaun Unida Kontra Korrupsaun (UNCAC-sigla inglés) no lei anti korrupsaun.
Nia dehan rekomendasaun UNCAC, tenke finaliza iha tinan ne’e, tanba la konsege iha tinan kotuk.
Kona-ba lei anti korrupsaun, komisáriu ne’e haktuir hato’o ona rekomendasaun hamutuk 12 ba komisaun A Parlamentu Nasionál bainhira halo audénsia hodi konsulta kona-ba lei ne’e.
Rekomendasaun KAK nian maka oinsá atu konsidera kona-ba natureza krime sira maka durante ne’e seidauk hatama iha lei kódiku penál ba lei anti korrupsaun hodi artikula iha proposta lei ne’e.
Komisáriu konsidera lei anti korrupsaun importante hodi hametin ordenamentu jurídiku nasaun, tanba ba futuru sei iha planu estratéjiku nasionál kona-ba kombate korrupsaun no hametin lei sira seluk.
Mesmu seidauk iha lei anti korrupsaun, maibé komisaun ne’e hala’o ona knaar sira hosi espesialista anti korrupsaun ne’ebe tinan barak hodi halo prevensaun.
“Ita iha funsionariu KAK 73, ita iha diresaun tolu investigasaun kriminál, diresaun ba prevensaun, sensibilizasaun no diresaun apoiu kooperasaun”, dehan.
Jornalista: Agapito dos Santos
Editora: Rita Almeida
