Diretór Ezekutivu ANAAA, Edmundo da Silva Viegas. Foto: UNILAB

DILI, 08 agostu 2019 (TATOLI)-Diretór Ezekutivu Ajénsia Nasionál Avaliasaun no Akreditasaun Akadémika (ANAAA) Edmundo Viegas hateten Institutu Siénsia Saúde (ISC), Institutu Superiór Filozofia no Teolojia (ISFT) no Institutu Filozofia São Francisco, Salezianu (IFSFS) seidauk bele hetan akreditasaun tanba ninia prosesu sei naruk.

“ANAAA haruka ona ninia ekipa avaliadór ba halo avaliasaun institusionál ba institutu ensinu superiór privadu foun tolu ne’e liuhusi avaliasaun dokumentu inklui kondisaun terrenu. No oras ne’e daudaun ekipa avaliadór prepara ona relatóriu avaliasaun hodi submete ba prosesu maske sei han tempu naruk atu foti desizaun,” hateten Diretór Edmundo Viegas ba TATOLI iha Ministériu Ensinu Superiór Siénsia no Kultura (MESSK), kinta (08/08/2019).

Diretór Ezekutivu ANAAA ne’e dehan prosesu ne’e la fasil  tanba rezultadu avaliasaun ne’e sei lori fali mai sekretariadu tékniku ANAAA nian sei halo fali avaliasaun ka apuramentu finál rezultadu sira ne’e depois mak sei aprezenta iha reuniaun Konsellu diretiva ANAAA nian hodi hetan apresiasaun hafoin aprezenta ba Ministru Ensinu Superiór Siénsia no Kultura atu aprova.

Diretór Edmundo Viegas hateten tan katak rezultadu preliminár ne’e sei fó sai fali ba instituisaun tolu ne’e atu haree inklui pedidu reklamasaun atu nune’e durante semana, instituisaun tolu ne’e hotu, karik hakarak hala’o reklamasaun ruma bele hato’o fila fali.

Tanba ne’e mak prosesu sira ne’e hotu hahú daudaun ona maibé presiza haree didi’ak atu nune’e kuandu desizaun ikus foti hasoru instituisaun tolu ne’e mós tuir duni padraun ne’ebé iha tanba instituisaun tolu ne’e mós la’ós foun, sira ninia prosesu ensinu aprendizajen ne’e mós halo kle’ur ona. “Maibé sira seidauk hetan akreditasaun agora mak ita foin halo avaliasaun ba sira ninia atividade sira ne’e,” dehan diretór ne’e

Notísia relevante: ANAAA Sei Akredita Tan Institutu Foun Tolu

ANAAA Akredita Ensinu Superiór 11, Departamentu 55 Hetan C

Jornalista: Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here