Diretór Ezekutivu ANAAA, Edmundo da Silva Viegas. Foto: UNILAB

DILI, 16 jullu 2019 (TATOLI)—Ajénsia Nasionál Avaliasaun no Akreditasaun Akadémika (ANAAA) avalia ona Instituisaun Ensinu Superiór sira iha territóriu Timor-Leste durante tinan tolu, konsege hetan duni instituisaun superiór 11  mak prienxe kritéria avaliasaun no agora hetan ona akreditasaun.

“Ita akredita Instituisaun Ensinu Superiór hamutuk 11 inklui Universidade Nasionál Timor-Leste (UNTL), UNPAZ, UNDIL, UNITAL IOB, DIT, Institutu Canosa, ICS, ICE, ICR no institutu Katóliku Baucau tanba sira estandarizasaun ne’e prienxe ona kritériu sira ne’e hotu,” dehan Diretór Ezekutivu ANAAA, Edmundo da Silva Viegas,  ba jornalista sira iha Salaun Ministériu Finansa, tersa (16/7/2019).

Kriteriu avaliasaun ne’ebé mak ANAAA uza hodi avalia Instituisaun Ensinu Superiór sira ne’e, nia hatutan, natoon to’o de’it ho standard (padraun) valór “C”. Avaliasaun ne’e mós la’ós hala’o iha semana ida-nia laran de’it maibé presiza tinan tolu hodi halo avaliasaun atividade kursu iha departamentu sira ne’ebé mak eziste iha instituisaun ensinu superiór sira ne’e.

“Husi departamentu 69 ne’ebé mak ami halo avaliasaun durante tinan tolu ne’e, konsege hetan duni ninia rezultadu kuaze pursentu 80 hetan valór “C”. Signifika sira liu ona husi avaliasaun ANAAA nian,” tenik Edmundo.

Nia afirma, kursu ne’ebé mak ANAAA avalia ne’e iha universidade nia laran ne’ebé kada depertamentu sira loke ba estudante sira. Tanba ne’e mak kuaze kursu iha departementu hamutuk 69 ne’ebé liu ne’e, husi universidade 11 ne’ebé liu ne’e. Iha kursu ka departamentu 55 ne’ebé liu ne’e, hetan de’it valór “C” ka departamentu 8  mak hetan “B” no departamentu 6 mak la akreditadu.

Husi departamentu neen (6) ne’ebé la akreditadu, nia haktuir, labele kontinua ona sira-nia prosesu no labele simu estudante foun durante tinan rua nia laran no labele halo graduasaun. Ida ne’e la’os universidade hotu maibé kriteriu ne’e fó de’it ba departamentu sira iha universidade nia laran. Signifika departamentu ida la prienxe kritériu hodi labele kontinua, tenke hadi’a maibé departamentu seluk ne’ebé di’ak kontinua la’o nafatin.

Notísia relevante:: http://www.tatoli.tl/2019/07/messk-preokupa-ensinu-superior-11-hetan-valor-sufisiente/

http://anaaa.gov.tl/tl/

Jornalista: Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here