Logotipu ANAAA

DILI, 17 jullu 2019 (TATOLI) –ANAAA (Ajénsia Nasionál Avaliasaun no Akreditasaun Akadémika-sigla portugés) sei kontinua halo avaliasaun ba Institutu haat foun ne’ebé iha hela faze lisensiamentu. Maibé, Institutu tolu mak pozitivu ona atu hetan akreditasaun.

Institutu haat ne’ebé mak ANAAA avalia daudaun maka Institutu Politékniku Betano (IPB), Institutu IFSS São Francisco Xavier Comoro, Institutu Superior Filozofia no Teolojia (ISFIT) Fatumenta no Institutu Siénsia Saúde (ISS) Maloa. Maibé, uniku IPB mak seidauk hetan rejultadu pozitivu atu akredita.

Diretór ANAAA, Edmundo da Silva Viegas informa katak planu no programa akreditasaun ba institutu tolu ne’e sei realija iha fulan jullu tinan ne’e. Prosesu akreditasaun ne’e nu´udar faze inisiál. Portantu faze lisensiamentu ba Institutu haat ne’e kompeténsia tomak Ministériu Ensinu Superiór Siénsia Kultura (MESSK) ninia. Maibé, ANAAA mós halo parte iha ekipa hodi halo avaliasaun.

“Ita hatene katak Institutu haat ne’e IPB nudar Institutu Publiku ne’ebé foun los. Agora Institutu tolu seluk ne’ebé atu hetan ona akreditasaun ne’e la´ós foun ona sira-nia prosesu ensinu aprendizajen ne’e la´o kle´ur ona inklui estudante barak mak hetan ona graduasaun,” hateten Diretór Edmundo Viegas, iha edifísiu ANAAA, Matadoru, tersa (17/07/2019).

Signifika kritériu ne’ebé mak ANAAA sei uza ba institutu foun tolu ne’e, tuir Diretór Ezekutivu ANAAA ne´e katak la sees husi prosesu akreditasaun ba Institutu 11 ne’ebé liu ona. “Portantu ANAAA oras ne’e daudaun preparadu ona atu alkansa serbisu sira ne’e para bele kontinua fokus ba planu no programa sira seluk ne’ebé adekuadu”.

Notísia relevante          : http://www.tatoli.tl/2019/07/anaaa-akredita-ensinu-superior-11-departamentu-55-hetan-c/?fbclid=IwAR3wdvGLzm0tyN8i5dLj43XbZjo0KCf9frWu71QpfMaYjzIWjgWgrnPQsFM

Jornalista        : Tomé Amado    

Editór              : Rafy Belo

HAKEREK NO HATÁN

Please enter your comment!
Please enter your name here