labarik nain rua tula malu ho bisikleta lori pisan goreng hodi ba faan.Imajen/Antonio Goncalves

DILI, 06 agostu 2019 (TATOLI)-Tuir Dadus Demográfiku no Xave Peskiza Saúde 2016, kuaze labarik na’in ida husi na’in haat (24%) husi 19% iha tinan 2009-2010 menus husi tinan lima sofre má-nutrisaun. Enkuantu labarik 6% ne’e liu pezu ka todan no aas.

“Ita haree ba  dadus labarik nian iha 2010 haree ba nia persentajen 38 sa’e ba 40% nutrisaun di’ak, ne’e loloos porsentu tun maibé agora ne’e sa’e. Maibé, ita liga ba inan feton sira idade 15 to’o 49 anos uluk 21 % agora sa’e ba 24%. Má-nutrisaun ne’e afeta husi saúde ijiene no mós todan no aas ba labarik nian, labarik sira husi 50% fulan menus husi tinan 5 mak afeta liu,’’ hateten Diretór Estatístika, Elias dos Santos Ferreira ba Ajénsia TATOLI iha nia kna’ar fatin, Caicoli, foin lalais ne’e. 

Nia dehan, dadus ne’e hatudu katak kompara ho tinan kotuk 2009 ho 2010 ba 2016 númeru sa’e maibé tuir loloos tuun, tanba ne’e, tuir diretór estatístika ne’e, importante liu mak governu bele haree liuliu Ministériu Saúde ba asuntu ida ne’e ho seriedade atu nune’e bele di’ak, liuliu labarik sira iha área rurál sira tanba iha área rurál sira ne’e nutrisaun ladún di’ak.

“Ita sempre hateten bei-beik katak hahán  limitadu no sufisiente maibé dala barak mós alimentasaun nee la dun favorese no mós ijiene iha uma laran mós la dun di’ak mak má-nutrisaun ne’e afeta ba labarik sira no inan-feton sira ne’ebé mak idade 15 to’o 49 anos,” hateten diretór ne’e.

Dadus Demográfiku no Xave Peskiza Saúde 2016 refere mós katak estatutu nutrisaun ba labarik sira kada rezidénsia (porsentu ba labarik idade menus husi 5, bazeia ba OMS-Organizasaun Mundiál Saúde Padraun ba Kreximentu Infantíl) totál impulsu-badak liu ba idade hamutuk 46, urbanu hamutuk 41 no rurál ne’e 47, tuir mai soe lakon (krekas demais wasted) totál 24, urbanu hamutuk 21 no rurál hamutuk 25 no pezu normál nia okos (krekas demais idade) totál 40, urbanu hamutuk 34 no rurál hamutuk 43 no mós todan liu totál 6, urbanu hamutuk 6 no rurál hamutuk 5.

Labarik ne’ebé impulsu kada munisípiu (porsentu ba labarik idade menus husi 5, bazeia ba OMS-Organizasaun Mundiál Saúde Padraun ba Kreximentu Infantíl) iha Timor-Leste hamutuk 46%. Iha munisípiu sira, Lautem (41%), Baucau (51%), Viqueque (52%), Manatuto (46%), Dili (42%), Aileu (46%), Manufahi (38%), Liquiça (47%), Ermera (29%), Ainaro (60%), Bobonaro (53%), Covalima (48%) no Oe-Cusse (51%).

Enkuantu, ba inan-feton sira enkuantu persentajen feto ne’ebé krekas nafatin hanesan iha 2009 to’o 2010 (27%); husi idade 15-49. Komparasaun entre feto ho mane, mane krekas ne’e 26% katak menus porsentu ida husi feto ka kontráriu persentajen feto krekas liu porsentu ida husi mane.

“Má-nutrisaun mosu husi hahán no mós ijiene husi uma laran, ida ne’e mak afeta liu ba saúde tanba iha área rurál tanba uma ne’ebé halo ho rai no mós soe sasán arbiru ida ne’e mak afeta má-nutrisaun,” konsidera Diretór Estatístika, Elias dos Santos Ferreira.

Tanba ne’e, diretór ne’e sujere governu liuliu Ministériu Saúde tau atensaun ba problema hirak nee tanba labarik barak mak afeta ba má-nutrisaun no liuliu mak diseminasaun informasaun ba ita-nia populasaun sira liu liubá inan isin rua no ba labarik sira ne’ebé mak hela iha área rurál, hodi nune’e bele salva sira-nia vida no liuliu mak hamenus má-nutrisaun ba labarik sira no mós inan feton sira isin rua.

“Má-nutrisaun mosu husi hahán no mós ijiene husi uma laran; ida ne’e mak afeta liu ba saúde no husu mós ba Ministériu Saúde hodi atende lalais problema hirak ne’e. Maibé, tuir ami tékniku nia haree ne’e afeta ba alimentasaun no mós ijiene uma laran tanba iha área rurál, uma ne’ebé mak halo ho rai no mós soe sasán arbiru. Ida ne’e afeta ba má-nutrisaun ne’ebé mak iha,” nia akresenta.

Notísia relevante:Peskiza: Labarik 90% Seidauk Asesu Ba Nutrisaun Di’ak

Labarik Idade Fulan 6 To´o Tinan 2 Presiza Hahan Saudável

Jornalista: Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here