Labarik nain tolu halimar hela iha bero Leten iha Tasi ibun Bidau Santana, Dili 29 Marsu 2017. Labarik sira halimar hodi hein sira nia aman sira neebe ba buka ikan iha Tasi laran.Foto TATOLI

DILI, 30 jullu 2019 (TATOLI)—Organizasaun CARE Internasionál Timor-Leste liuhusi Programa Hatutan Nutrisaun no Edukasaun hala’o peskiza kona-ba Mal Nutrisaun ne’ebé hala’o ba família lubun ida iha munisípiu haat iha Timor-Leste, rezulta kuaze labarik 90% mak seidauk asesu ba nutrisaun ida di’ak.

Nicole Seibel husi CARE Internasional iha Timor-Leste konsidera tinan rua perkiza ne’ebé sira halo ba família sira iha munisípiu haat área remotas no rurál hatudu kuaze labarik 90% mak seidauk asesu ba nutrisaun ida di’ak.

“Ami-nia peskiza tinan rua iha Munisipiu Ainaro, Ermera, Liquiça, Manatuto, konsege haree hetan inan 10% de’it mak tuir ona padraun rekomendadu Ministériu Saúde nian hodi asesu ba ai-han ho nutrisaun di’ak maibé labarik 90% mak seidauk asesu ba nutrisaun,” dehan Xefe Programa Hatutan Nutrisaun no Edukasaun iha CARE Internasional, Nicole Seibel, ba jornalista sira iha Hotel Ramelau, tersa (30/7/2019).

Inan sira iha área remotas no área rurál, nia hatutan, barak liu mak sei asesu hela ba ai-han hanesan batar, ai-farina, etu no paun. Maibé ai-han seluk hanesan modo tahan no na´an difisil atu hetan para fó susu ba sira-nia oan sira ne’ebé sei ki´ik.

Tuir nia, ai-han ne’ebé mak inan sira fó ba sira-nia oan seidauk tuir ka balansu dieta tuir padraun Ministeriu Saúde nian. Família sira, tuir nia, barak mós seidauk kuidadu higiene iha uma laran liliu kona-ba sintina no bee-moos.

Xefe programa ne’e hateten, Ministériu Saúde fó sai ona kona-ba nutrisaun di’ak no família sira tenke han ai-han ne’ebé variedade para bele hetan vitamina no proteina. Maibé, família sira iha remotas barak mak lahetan ida ne’e.

“Se inan sira la han tuir padraun ida ne’e mak dala barak difikulta labarik sira atu dezenvolve ninia abilidade, hanoin, isin atu estuda tanba labarik sempre hasoru difikuldade,” nia esplika.

Nia informa, labarik sira husi tinan nurak 0—loron 44 importante liu atu hetan nutrisaun ida di’ak ba ninia isin. Atu nune’e, uainhira avansa ona ba tinan rua, labarik ne’e bele dezenvolve ona ninia abilidade maibé kuandu nutrisaun la di’ak, hanoin atu dezenvolve ninia-án mós sei neineik liu.

Tanba ne’e, CARE Internasional rekomenda ba Ministériu Edukasaun atu uza rezultadu peskiza ne’ebé iha ona, para ba oin hodi tulun família kbiit laek sira iha área remotas atu bele asesu ba nutrisaun ida di’ak hodi tulun oan sira ne’ebé sei nurak.

Jornalista : Tomé Amado

Editóra    : Rafy Belo

2 KOMENTÁRIU

  1. Ho kondisaun ida hanesa ne nebe 90% labarik sira seidauk assesu ba nutrisaun, halo oin sa mak ita ansi tama ASEAN?

HAKEREK NO HATÁN

Please enter your comment!
Please enter your name here