PN liuhosi reuniaun Plenária Ordinária, Tersa (14/5/2019), aprova ona rezolusaun kona-ba komemorasaun loron mundiál ba família ne’ebé monu iha loron 15 maiu, tinan-tinan. Imjan/Media PN

DILI, 8 jullu 2019 (TATOLI)—Parlamentu Nasionál liuhusi deputadu Aliansa Mudansa ba Progresu (AMP) altera ona artigu rua hosi lei Nú. 3/2014 tanba konsidera inkonstistusionál.

Artigu 86 no 103 ne’e konsidera inkonstitusionál tanba implementasaun ne’e la tuir ninia dalan. Loloos, tuir deputadu sira, Governu Sentrál mak iha podér atu nomea, fó pose no ezonera Prezidente Autoridade Rejiaun Administrativu Espesiál Oé-Cuse Ambeno (RAEOA) no Zona Espesiál Ekonomia Sosiál Merkadu (JEESM) maibé entrega fali podér ne’e ba Prezidente Repúblika (PR).

Vise Prezidente Komisaun A trata Asuntu Konstitusionál no Justisa, Francisco de Vasconcelos hateten nu’udar deputadu proponente ninia parte esforsu atu halo armonizasaun ba lei ne’ebé kontrária ba malu.

Nia esplika, kompeténsia PR nian deskreve tiha ona iha konstituisaun RDTL artigu 85 no 86, katak kompeténsia Xefe Estadu nian hili de’it figura ne’ebé desidi tiha ona mak hanesan Primeiru-Ministru, membru governu, Prokuradór Jerál Repúblika, Prezidente Tribunál Rekursu, Membru Konsellu Superiór Defeza, membru Konsellu Estadu no Xefe Estadu Maiór ho nia vise.

“Tanba mosu inkonstitusionál iha artigu rua ne’e mak Parlamentu Nasionál liuhosi deputadu AMP hakarak armoniza tiha artigu rua ne’e nune’e ba futuru labele prejudika tan kompeténsia sira ne’e. Ita la tau ketsaun sé-sé mak atu kontinua kaer fali pasta atu lidera RAEOA no ZEESM maibé labele uza maiorai okazionál hodi fó fali kompeténsia ba PR atu halo serbisu ne’ebé kontrária ho konstitusaun RDTL,” dehan nia iha Parlamentu Nasionál, ohin.

Nune’e mós, Prezidente Bankada Kmanek Haburas Unidade Timor Oan (KHUNTO), António Nobre realsa katak razaun iha duni atu altera artigu rua ne’e tanba PR laiha kompeténsia kona-ba nomeasaun Prezidente Autoridade nian iha RAEOA-ZEESM.

“Ita halo alterasaun ba artigu rua hosi lei númeru 3/2014 ne’e tanba konsidera inkonstitusionál. Ita haree artigu 86 ne’e la prevee kompeténsia Prezidente Repúblika nian atu fó pose no atu nomea inklui ezonera Prezidente RAEOA. Maibé, kompeténsia ne’e prevee iha artigu 103 ne’ebé fó kompeténsia ba Governu Sentrál mak atu nomea no fó pose,” Nobre afirma.

Entretantu, hosi diskusaun lei númeru 3/2014 ne’e hetan duni alterasaun liuhosi votasaun jeneralidade ho votu afavór 34, kontra 0 no abstensaun 0.

Diskusaun refere, halo deputadu bankada opozisaun hanesan FRETILIN, PD no PUDD walk out (abandona) plenária tanba alterasaun ba lei refere ho indikasaun urjénsia ne’ebé la liuhusi konsultasaun antes altera.

Iha parte seluk, Bankada Parlamentár FRETILIN hola pozisaun la partisipa iha debate alterasaun ba lei Nú. 3/2014 kona-ba Rejiaun Administrativa Espesial Oé-Cusse no Zona Espesiál Ekonomia Sosiál Merkadu (RAEOA-ZEESM TL) tanba bloku AMP trata lei estruturante ida ne’e ho urjénsia de’it, laiha konsulta, laiha diálogu no laiha audiénsia públika.

“Baixa iha loron tersa, kuarta asesór sira prepara pareser no konvida ona Komisaun A atu ba aprova. Sira aprova duni tanba sira maioria,” deputadu bankada FRETILIN, Aniceto Guterres esplika.

Deputadu ne’e adianta katak Bankada FRETILIN nia pozisaun mak lei estruturante ida hanesan ne’e, labele trata ho urjénsia no presiza iha diálogu.

“Ami-nia pozisaun, lei estruturante ida henesan ne’e, atu altera, bele altera kualkér tempu, maibé ami-nia pozisaun mak atu altera lei estruturante ida hanesan ne’e, ita ko’alia ba malu, ita konsulta, presiza ka lae? Altera karik altera halo nusa, tanba tenki haree mós ninia implikasaun depois altera ida ne’e,” Aniceto hatutan.

Nia informa, tanba alterasaun lei ida ne’e ninia objetivu mak atu hametin liu-tan programa Estadu ida ne’ebé la’o ona, ka atu sobu fila fali, tan ne’e parte sira hotu-hotu tenke iha votande atu halo lei ida ne’ebé di’ak no responde duni nesesidade dadauk ne’e.

“La’ós maioria ida hakarak altera, hakarak muda, muda tuir sira-nia hakarak, depois liuhusi prosesu ida hanesan urjente de’it, Parlamentu Nasionál mai para fó karimbu de’it,” nia realsa.

“Bankada FRETILIN konsidera prosesu alterasaun lei ida ne’e, AMP nu’udár maioria la konsidera FRETILIN. Deputadu sira proponente ba alterasaun lei ida ne’e, ida mak dirije meza Komisaun A no Komisaun ida ne’e duni mak halo pareser ba alterasaun ida ne’e. Ida ne’e hatudu momoos alterasaun lei ida ne’e atu serbí sé nian interese,” Xefe Bankada FRETILIN ne’e haktuir.

Nia haklaken, RAEOA-ZEESM TL ne’e programa Estadu nian, la’ós projetu tanba ne’e alterasaun lei ida ne’e labele halo ho intensaun atu serbí de’it interese maioria ninian, ne’ebé iha posibilidade boot bele la fó kontinuidade ba programa Estadu nian ida ne’e.

“Programa iha RAEOA-ZEESM TL ne’e programa Estadu tanba ne’e mak dezde inísiu, nomeasaun Prezidente RAEOA-ZEESM TL, Prezidente Repúblika mak halo nomeasaun. Mudansa ida agora ne’e sei muda mós grau RAEOA-ZEESM TL hosi programa Estadu ba programa Governu babain ida. Se Konsellu Ministru mak nomea, aban bainrua Governu ida sa’e, maski ukun loron ida ka loron rua de’it mós, Governu foun ida bele troka. Se troka ba-mai hanesan ne’e la ajuda tanba implementasaun programa Estadu ida ne’e depende ba andamentu polítika,” Aniceto subliña.

Entretantu, deputadu bankada Partidu Demokrátiku (PD), Mariano Assanami Sabino husu ba Prezidente Parlamentu Nasionál, Arão Noé de Jesus no deputadu bankada governu sira atu tetu no estuda ho didi’ak tanba funsionamentu RAEOA-ZEESM ne’e la’o tiha ona tinan lima mak hanoin atu alteta fali signifika polítika ida ne’e mós kontribui ona ba iregularidade.

Assanami informa labele halo sasán sira ne’e la konsistente tanba lei sira ne’e atu garante establidade estadu nian.

“Sé maluk AMP sira sente katak artigu rua iha lei Nú. 3/2014 ne’e iregularidade no hanoin atu hadi’a para tuir duni lei no labele muda tan entaun tenki estuda ho didi’ak para bele garante funisonamentu RAEOA-ZEESM nian ba oin ho di’ak liu-tan,” nia propoin.

Nia husu atu la bele hanoin katak buat ne’ebé interese estadu nian ne’e interpreta fali ba interese partidária tanba estadu ne’e harii ho aliserse ida forte mai husi ruin no ran, tan ne’e tenke harii ho forti para bele la’o di’ak.

Jornalista: Tomé Amado

Editór: Xisto Freitas

HAKEREK NO HATÁN

Please enter your comment!
Please enter your name here