DILI, 2 agostu 2019 (TATOLI)—Igreja Katólika ho Governu sei forma ekipa hodi hala’o diskusaun kle’an kona-ba konkordata ho Santa Sé.
Repúblika Demokrátika Timor-Leste ho Santa Sé hala’o ona konkordata ho Santa Sé iha 14 agostu 2015, ne’ebé ko’alia kona-ba dezenvolvimentu iha Timor-Leste, liliu asuntu edukasaun.
“Enkontru ho Primeiru-Ministru ne’e pedidu hosi Konferénsia Episkopál, ne’ebé ko’alia kona-ba konkordata, tanba Governu ho Igreja tenke tuur hamutuk hodi forma ekipa trata asuntu ne’e no kona-ba mós subsídiu Governu ba Igreja,” Prezidente Konferénsia Episkopál, Bispu Don Norberto Amaral, ba jornalista sira, hafoin hasoru malu ho Primeiru-Ministru, Taur Matan Ruak, iha Palásiu Governu, sesta ne’e.
Lee mós:
Konkordata Santa Sé Ho Timor-Leste, 50% Ba Área Edukasaun
Don Basílio Hasoru Primeiru-Ministru Hodi Konfirma Konkordata
Akordu Balun Entre Timor-Leste No Santa Sé Seidauk Implementa
Iha hasoru malu ho Xefe Governu ne’e, partisipa mós bispu rua seluk hanesan Bispu Dioseze Dili, Don Virgílio do Carmo da Silva no Bispu Dioseze Baucau, Don Basílio do Nascimento.
Soru-mutu ne’e ho objetivu husu Primeiru-Ministru, Taur Matan Ruak, atu disponibiliza ekipa Governu ho Igreja bele tuur hamutuk hodi estuda lisuk konkordata ne’ebé iha hodi hatuur asuntu ne’e tuir dalan loos.
“Primeiru-Ministru indika tiha ona minstériu ida depois ministériu ne’e sei forma ekipa atu tuur hamutuk hodi hala’o. Segunda agora (5/8), sira (ekipa Governu no Igreja) hasoru malu depois pontu ida ne’e mak atu debate uluk konforme ekipa rua ne’e tuur hamutuk,” informa Prezidente Konferénsia Episkopál.
Jornalista: Evaristo Soares Martins
Editór: Xisto Freitas
