Prezidente Konferénsia Episkopál, S. Eminénsia Reverendísimu Amu Bispu Don Norberto do Amaral. Imajen Tatoli/Egas Cristóvão

DILI, 2 agostu 2019 (TATOLI)—Igreja kondena maka’as inan deskoñesidu sira ne’ebé soe bebé, tanba ne’e konsideradu hahalok irresponsabilidade kontra Nai Maromak nia ukun-fuan lima.

“Ne’e sala boot ida kontra Nai Maromak nia ukun-fuan lima (keta oho no keta na’uk). Dezde ita sei ki’ik, doutriña ne’e ita hotu hatene. Moris ne’e Nai Maromak de’it mak halo no inan-aman halo ne’e tanba domin. Ita ne’e Katóliku ka ita ne’e jintiu ka ema ne’ebé fiar laiha? Tanba buat ida soe bebé ne’e oho ema ka hasai ema-nia moris,” Prezidente Konferénsia Episkopál, Bispu Don Norberto Amaral, ba jornalista sira, hafoin hasoru malu ho Primeiru-Ministru, Taur Matan Ruak, iha Palásiu Governu, sesta ne’e.

Lee mós:

Presiza Investiga Kle’an Kauza Hosi Inan Soe Bebé

Soe Bebé, Rede Feto Konsidera Falta Morál

Oho Malu, Soe Bebé no Tolok Malu, Sai Hanesan Vokabuláriu Ida

Pe. Juvito: “Soe Bebé Ne’e Irresponsabilidade Morál”

PJR Esklarese Polémika Kazu Soe Bebé Ba Prezidente Repúblika

Bispu Dioseze Maliana ne’e bolu atensaun  ba povu  liliu ba sarani Katóliku sira, atu lori sira-nia aan ne’e didi’ak nu’udar ema ne’ebé fiar na’in, labele hanesan ema ne’ebé jintiu maran.

Bispu ne’e fó hanoin ba sarani hotu katak, kuandu halo sala ona, tenke rekoñese sala ne’e hodi hadi’a aan no respeita moris ne’e.

“Se moe, iha instituisaun barak, liliu madre sira no kongregasaun barak no organizasaun barak, ne’ebé disponível atu tau-matan ba labarik,” Amu Bispu subliña.

Líder Igreja Katólika ne’e hatutan, kada domingu, Igreja sempre aviza sarani sira hotu atu hakribi hahalok ne’e, maibé ema kontinua soe bebé.

Tanba ne’e, Bispu dehan, Igreja sei esforsa-aan hodi fó hanoin nafatin ba sarani sira hotu atu respeita ema-nia moris, tanba ema ida atu moris mai tanba inan-aman mak hakarak, maibé inan ka aman labele impede fali oan ne’ebé atu moris.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here