Porkuradór Jerál Repúblika (PJR), Jose Ximenes, Imajen/Egas Cristovão

DILI, 30 jullu 2019 (TATOLI) –  Deputada Bankada CNRT, Maria Barreto,  husu Ministériu Públiku investiga kle’an kauza hosi inan-feton balun soe bebé no nia husu labele hare de’it ba autór ne’ebé soe.

‘’Ita labele haree de’it ba autór ne’ebé soe bebé, maibé ita mós tenke haree se maka fó isin rua  ba feto ne’e, ida ne’e mak presiza hatene, atu nune’e ita hatene abut problema”, nia halo intervensaun iha plenária tersa ne’e.

Tuir deputada ne’e, Se iha prosesu investigasaun parte ida ne’ebé mak sai autór hodi fó isin rua dalaruma ita abandona hela entaun kazu hanesan sei akontese ba beibeik.

“Ita labele prevene, ita labele kombate”, Deputada Maria Barreto akresenta.

Fatin hanesan Deputada Bankada FRETILIN, Helena Martins preokupa ho kazu soe bebé ne’ebé oras ne’e kontinua aumenta.

‘’Kazu soe bebé ne’e públiku kestiona ema ne’ebé hili bebé sai fali kondenadu, entaun ikus-ikus públiku hatete dehan di’ak liu husik labarik mate ba mak ita rame-rame, do que ita salva tiha nia vida, ita mak sai fali na’ok tén no ita mak sai fali kondenadu’’, nia dehan.

Hatan ba kestaun ne’e, Prokuradór Jerál Repúblika (PJR), José da Costa Ximenes husu ba públiku bainhira hatene ema soe bebé tenke informa ba autoridade kompetente hanesan polísia hafoin ba prokuradoria distritál.

PJR dehan iha kazu ne’e bebé mak sai vítima ba prosesu ne’e, tanba inan-aman laiha responsabilidade.

‘’Ha’u hanoin barak la konkorda ho hau. Hau fó ezemplu se ita hetan mate isin ida, ita fó hatene malu dehan subar tiha ou tau ita nia naran apelidu ita ba hakoi, nune’e mós hetan bebé sei moris mós tenke halo hamsane’’, akresenta José Ximenes.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here