Bispu Dioseze Dili, Don Virgílio do Carmo da Silva, ko’alia ba jornalista sira iha Palásiu Prezidente Nicolau Lobato, foin lalais ne’e, bainhira hamutuk ho reprezentante relojiaun sira seluk hala’o enkontru ho Xefe Estadu Lú Olo. Imajen Ajénsia Tatoli/Xisto Freitas

DILI, 13 juñu 2019 (TATOLI)Bispu Dioseze Dili haktuir, iha Timor-Leste, bainhira haree televizaun, lee jornál, haree iha mídia sosiál (facebook), iha liafuan ne’ebé sadik malu nian, tolok, hatuun malu, provoka malu, lori lia ba malu, bosok, sai hanesan toman aat ida ne’ebé lori sarani wa’in dook husi Nai Maromak.

“Maski bainhira iha haree televizaun, ita lee jornál, ita haree iha mídia sosiál (facebook) liafuan ne’ebé sadik malu nian, tolok, hatuun malu, provoka malu, lori lia ba malu, bosok, na’uk, interese pesoál, interese grupu no dala barak hamosu hahalok sira ne’ebé hanesan seksu livre, soe bebé, moras HIV/SIDA, arte marsiál, rama ambon, droga, taa-malu, oho malu, sai tiha fali vokabuláriu ida ka toman ida ka kultura ida Timor nian,” dehan Bispu Dioseze Dili, Don Virgílio do Carmo, SDB, iha ninia omília iha selebrasaun misa ba Mahein St. António Parókia Motael no Mahein ba PNTL, ba sarani no krizmadu 500 resin iha igreja Motael, kinta (13/6/2019).

Don Virgílio hatutan, St. António ohin konvida sarani sira, liliu foinsa’e sira ne’ebé atu simu dadaun krizma atu halo pauza uituan hodi fó tempu uituan atu hateke ba St. António, atu fihir ba St. António hodi haree iha St. António nia liman iha livru símbolu pureza, laran moos, mutin moos. La’ós de’it loron krizma ninia mak hatais mutin maibé sarani nia moris nafatin hanesan ema ne’ebé laran moos iha Maromak nia oin no maluk sira-nia oin.

Iha St. António nia liman, líder Igreja Katólia ne’e esplika, Don Virgílio esplika, St. António ko’us hela Meniñu Jesus ne’e hatudu katak Jesus mak sentru iha ninia moris tomak. Entaun, saida mak presiza atu bele fó sabór ba rai ida ne’e, St. António husu sarani sira atu sai masin atu bele fó duni sabór ba rai ida ne’e, ba sosiedade ida ne’e no ba Uma-Kreda ida ne’e liuhusi sasin moris loro-loran nian.

“Ha’u sita Amu Papa ninia liafuan ne’ebé konvida ita beibeik ho jestu ida katak, mai ita hanorin ita-nia oan sira ho linguazen domin no linguazen dame nian. Mai ita tatoli, fó sasin, fó ita-nia vida, ho ita-nia liafuan, ho ita-nia hahalok, ho ita-nia moris liuhusi linguazen domin no linguazen dame ba ita-nia oan sira. Ba imi foinsa’e sira, mai haburas linguazen dame nian iha imi-nia leet,” amu bispu hateten. “Santo Padre mós dehan, iha ne’ebé mak iha lia bosok, nune’e mós iha ne’ebé mak iha lia-tolok, iha ne’ebá laiha domin no laiha dame.”

Ohin, Don Virgílio haklaken, oportuniddae di’ak ida hakarak fó apresiasaun boot tebes ba exelénsia komandante jerál PNTL nian ho ninia ekipa ba sira-nia inisiativa hakerek mós istória foun ida iha instituisaun PNTL nia laran, hodi rekoñese fidelidade kaben-na’in lubuk ida iha instituisaun nia laran ne’ebé iha misa ne’e nia laran duni sei fó rekoñesimentu ida ba sira.

“Ita saran família sira la’ós de’it família sira ne’ebé orsida atu simu rekoñesimentu maibé saran ba família hotu-hotu ne’ebé pertense ba iha Parókia St. António Motael nian, ita saran sira ba santu kazamentu atu família sira bele sai duni knuuk ba domin no dame ninian,” Amu Bispu esklarese.

Jornalista: Cancio Ximenes

 Editór: Xisto Freitas

HAKEREK NO HATÁN

Please enter your comment!
Please enter your name here