Atleta Taekwondo halo ezame nasionál. Imajen Tatoli/Hortençio Sanchez

DILI, 7 jullu 2019 (TATOLI)—Atleta Taekwondo hamutuk 959, domingu (7/7), halo ezame nasionál hodi hasa’e sintu iha Zinájiu Dili. Atleta hirak ne’e kompostu hosi Dojan 24 ne’ebé durante ne’e hala’o treinamentu iha Dili laran.

Dojan hirak ne’e mak hanesan Koni atleta hamutuk 145, CFP hamutuk 118, Comoro Sentru B hamutuk 19, B3 hamutuk 52, Suleur hamutuk 8, Choke hamutuk 15, Kampar hamutuk 19, 4 de Setembro hamutuk 21, Dragon UNTL hamutuk 103, Dolphin hamutuk 32, Hera Portu hamutuk 25, Delta One hamutuk 24, XSC hamutuk 37, Culuhun hamutuk 28, IPDC hamutuk 53, Sionál hamutuk 25, Bairru Militár hamutuk 57, Metinaro hamutuk 27, Crocodile hamutuk 14, UNPAZ hamutuk 14, São Francisco Xavier hamutuk 19, Chea de Graça hamutuk 27, Liurai hamutuk 19, BOP Tasitolu hamutuk 21 no Rosario TKD hamutuk 37.

Prezidente Federasaun Taekwondo Timor-Leste, Angelo Neves

Prezidente Federasaun Taekwondo Timor-Leste, Angelo Neves hateten, ezame nasionál ne’ebé realiza atu hasa’e no aumenta kapasidade atleta sira nian ho di’ak liu-tan.

“Ezame ida ohin hamutuk ba dala rua. Ida ne’e la inklui munisípiu sira seluk maibé Dili de’it. Iha ezame novembru mai ne’e mak sei involve munisípiu sira halo ezame iha Dili. Ezame ba munisípiu sira nian agora komisaun hosi nasionál mak ba fó de’it. Bele dehan ezame ida ohin atleta sira hasa’e sintu tuir eskada nune’e bele aumenta mentalidade atleta sira nian,” tenik Angelo.

Nia esplika, ezame refere atleta sira sa’e sintu hosi hosi Sintu Mutin to’o Mean trasu ida. “Sintu Mutin sa’e ba Kinur, Kinur Traju sa’e ba Modok, Modok sa’e ba Traju Azúl, Traju Azúl sa’e ba Azúl, Azúl sa’e ba Mean, Mean sa’e ba Traju ida, Mean traju ida sa’e ba Mean Traju rua,” nia esplika.

Entretantu, orsamentu ba ezame nasionál ne’e rasik mai hosi atleta hirak ne’ebé partisipa. Kada atleta kontribui osan dolar sanulu resin-rua ($12) ba treinadór ida-idak nune’e bele prepara hahán, transporte no seluk-tan.

“Osan ne’ebé atleta sira hatama ba sira nia treinadór maizumenus dolar sanulu resin-rua. Osan ne’ebé hatama mai Federasaun kada atleta ida dolar lima ($5). Osan hirak ne’e prepara hahán ba komisaun, selu komisaun no halo mós atleta sira-nia sertifikadu,” dehan Angelo.

Aleinde ne’e, iha loron horsehik ne’e, hala’o mós ezame nasionál ne’ebé hanesan espesiál ba Sintu Metan ne’ebé hanaran Pun ho Dan ne’ebé ho kualidade internasionál.

 “Horsehik halo mós ezame maibé ba de’it Sintu Metan Pun hamutuk 32. Maibé, atu sa’e Sintu Metan Dan 1 no Dan 2 sei ba hasa’e iha Korea,” Angelo informa. Eventu refere hala’o durante loron rua (hahú horsehik no ramata ohin).

Jornalista: Hortençio Sanchez

Editór: Xisto Freitas

Lee Mós PR Lú Olo Samba Sembilan Marka Diferensa Brani iha Funu

Lee Mós:Julgamentu Masakre Kuluhun, FAM Deklara JAP Mak Tiru Vítima

HAKEREK NO HATÁN

Please enter your comment!
Please enter your name here