Arguido sira ba Masakre Kuluhun, Dili, ovin, tuer audensia julgamentu iha TDD. Imajen/Domingos Piedade Freitas

DILI, 04 jullu 2019 (TATOLI) – Tribunál Distritál Dili (TDD), ohin, halo audiénsia julgamentu ba autór  masakre Kuluhun.

Masakre ne’ebé akontese iha kalan 17 Novembru 2018,  rezulta joven na’in tolu mate no na’in lima seluk kanek todan.

Iha audiénsia julgamentu ne’e Arguido ho inisiál FAM, deklara ba Tribunal katak, arguido JAP mak tiru vítima  sira iha festa laran momentu ne’ebá.

Tuir akuzasaun Ministériu Públiku (MP) katak arguido JAP serbisu nu’udar Polisia Nasionál Timor-Leste, iha Departamentu Informasaun/intelijénsia no arguido uza Pistola Glock 19 ho númeru seriál EEH747.

Arguido seluk ho inisiál FAM serbisu nu’udar Polisia Nasionál Timor-Leste, iha unidade Marítima no uza Pistola GLOCK 19 ho númeru serial FHX 430.

Iha loron  momentu ne’ebá, arguido JAP ho FAM partisipa iha festa kore-metan iha Aldeia Kuluhun de Baixo, Suku Akadiru-Hun, Postu Administrativu Nain Feto, Munisípiu Dili.

Festa kore-metan ne’e rasik halo ba matebian João (Aduan) no festa ne’e hahú iha tuku 19:00 Otl, no realiza iha matebian nia uma.

Bainhira festa ne’e lao to’o iha tuku 00:00 Otl, arguido FMS nia alin, Evangelino Mateus Lim Sousa, fó hatene ba konvidadu sira katak festa ne’e sei ensera ou taka tanba kalan boot ona. Maibé, matebian João nia kaben Maria Elinda, la konkorda no hakarak festa nee kontinua nafatin too dadersan.

To’o iha tuku 01:00 madrugada, komesa ona barullu iha tenda laran no joven na’in rua diskute malu no halo situasaun komesa manas hodi halo konvidadu sira pániku no halai sai husi tenda laran.

Haree ba situasaun ida nee, Joanico Baptista Carvalho hakbesik ba hodi hafahe tiha joven na’in rua ne’ebé halo problema nee, no haruka sira atu hakmatek hodi kontinua festa too dadeer.

Iha situasaun hanesan, arguido FAM, ne’ebé tur hela iha tenda laran hakat ba foti kadeira masa ida hodi hamriik iha kadeira leten ho hakilar ba joven sira ne’ebé halo barullu ne’e no losu Pistola iha nia kanotak tiru dala lima iha tenda laran.

Arguido JAP ne’ebé hamriik besik hela iha arguido FAM nia kotuk hakilar iha tenda laran hodi dehan tiru-tiru, no tuir mai arguido JAP hasai Pistola husi nia kanotak hodi tiru dala barak ba ema sira ne’ebé hamriik iha tenda laran no halo ema hotu pániku no trauma.

Altura ne’ebá Joanico Baptista Carvalho haree joven iha ho naran Pinto Gama hetan tiru no monu tun hela iha tenda laran, ho nune’e Joanico Baptista Carvalho hasé kedan arguido JAP hodi dehan,  “tanba saida mak o tiru ema,”.

 Arguido JAP ho lian makaas dehan, “o se?” nune’e, Joanico hatan ba Arguido José hodi dehan, “hau militár”.

Rona Joanico koalia hanesan nee arguido JAP hatama fila fali Pistola ba iha nia kanotak foti motor hodi halai sees husi fatin akontesimentu.

Husi akontesimentu nee rezulta ema na’in tolu mate no na’in lima kanek todan. Vítima ne’ebé mate mak hanesan Erick Joni Robertus Bria, tinan 24, mate tanba hetan tiru iha parte ulun, rezulta ulun fatuk nakfera, Luis Saldanha, tinan 18, mate tanba hetan tiru iha parte kakorok, rezulta aten book sorin loos naklees no Leonildo Eduardu Ximenes Sequeria, tinan 20, mate tanba hetan tiru iha parte kakorok, rezulta aten book sorin loos naklees.

Vítima sira ne’ebé mak hetan kompostu husi  Paulino de Jesus, tinan 37, hetan tiru iha liman kabun parte loos, baixa iha Ospitál Nasionál Guido Valadares (HNGV-sigla portugéas), durante loron 2, Terezinha Vilanova Pasheco, tinan 26, hetan tiru iha liman kabaas parte loos, baixa iha ONGV durante loron 5, Lucio do Carmo, tinan 31, hetan tiru iha kotuk laran, baixa iha ONGV, durante loron 20, Agripinho João da Costa, tinan 20, hetan tiru iha parte kanoruk no borus ba hasan parte karuk, baixa ONGV durante fulan 1 nia laran no Pino Gama, tinan 26, hetan tiru iha parte kotuk laran, baixa iha ONGV, durante fulan ida mos.

Hafoin akontesimentu ne’e PNTL husi serbisu Investigasaun Kriminál Nasionál rekolla no halo apreensaun ba Pistola hat ho marka GLOCK 19 EEH 747, GLOC 19 FHX 430, GLOCK 19 EEH 425 ho GLOC 19 ENU 257, karregadór hat, munisoens 32 bala musan deflagrada 3 no involkrus delfgrados 12, ne’ebé mak deskonfia uza hodi tiru vítima ho lezadu sira.

Iha loron 18 Dezembru 2018, haruka objetu a-prendidu sira temi iha leten ba Polisia Sientífika Investigasaun Kriminál (PSIK) halo ezame laboratóriu balístiku hodi identifika pistola ida ne’ebé mak arguido sira utiliza hodi tiru lezadu ho vítima sira.

Tuir relatóriu, teste balístiku, nomeadamente hatudu katak bala musan deflagrada 3 no involkrus delfgrados 12 ne’ebé mak hetan iha fatin akontesimentu mai husi Pistola 2 ho marka GLOCK 19, númeru serial FHX 430, indentifikadu Arguido JAP maka uza.

Husi relatóriu ezame balístiku refere, hatudu momoos katak vítima tolu ne’ebé mak mate no nian lima kanek todan ne’e hetan tiru husi arguido JAP ho FAM.

Arguido JAP ho FAM, iha altura ba tuir festa kore-metan ne’e fora husi oráriu serbisu, ho nune’e la devia arguido sira lori armas ba iha festa.

Arguido JAP ho arguido FAM lori armas/pistola sira ne’e ba iha festa kore-metan sein koñesimentu no autorizasaun husi sira nia superior rasik.

Arguido sira serbisu hanesan membru PNTL kuaze tinan barak ona, no hatene didi’ak regra interna PNTL nian kona-ba utilizasaun arma nian ne’ebé mak define klaru katak bainhira membru PNTL sira atua situasaun ruma iha terrenu ne’ebé mak liga ba ameasa komún, tenke fó sinál ou tiru xamada dala tolu ba leten, maibé iha situasaun ida ne’e kontráriu arguido sira tiru-teu direta ba ema sira iha tenda laran, sein fó sinál ruma hodi rezulta Erick Joni, Luis Saldanha ho Leonildo Eduardo Ximenes Pasheco, Lucio do Carmo, Agripinho João da Costa ho Pinto Gamo sofre kanek todan.

Husi rezultadu sira iha leten, demonstra katak arguido sira la kumpre Lei orgánika PNTL nian (LEI N.9/2009) ne’ebé mak hateten katak atuasaun hotu ne’ebé mak forsa Polisia uza bazeia ba lei no orden ne’ebé vigór iha TL.

Arguido sira ne’e hatene hela katak sira nia konduta/hahalok sira ne’e halo daudaun hela krime ida kontra ezersísiu husi nia funsaun sira hanesan PNTL ne’ebé mak fó protesaun no seguransa ida seguru no dignu ba sidadaun hothotu tuir lei haruka.

Arguido sira uza material/arma Estadu nian hodi tiru mate no halo kanek sira nia sidadaun rasik no halo ema pániku, lahakmatek no moris iha situasaun trauma nia laran.

Arguido JAP ho FAM hakarak duni, deliberadamente prejudika norma funsionamentu serbisu ninian no estraga imajen Instituisaun PNTL iha komunidade sira nia leet.

Arguido sira hateten katak ho sira nia komportamentu ne’e, hatudu katak sira lahatene norma no prosedimentu legal sira kona ba prestasaun servisu públiku haluha tiha devér jerál sira lealdade, obediénsia, zelu no izensaun nian.

Arguido sira ne’e atua deliberada, livre no konsientemente, sira hatene hela katak sira labele halo hahalok hanesan ne’e ho hahalok sira ne’e kontra lei. Ho hahalok sira nee konstitui Arguido JAP ho FAM, nu’udar ko autór material ho forma konsumadu ba iha konkursu real krime 3 husi Omisídiu agravadu no krime 5 husi Omisídiu agravadu ho forma tendata ne’ebé previstu no punidu iha artigu 139 al. b), reforsa ho art.30 n, 2 I 35 n. 1, hotu-hotu husi kódigu Penál.

Iha audiénsia julgamentu arguido JAP hili nonook hodi lakohi hatán ba akuzasaun sira ne’e, maibé ba arguido FAM konfesa katak iha momentu ne’ebá iha barullu uitoan iha festa laran entre joven sira, no nia rasik mak akalma duni situasaun. Maibé, mosu tan barullu iha kalan fahe rua mak nia rasik tiru sae pistola dala 3, no liu minutu 2 tan situasaun komesa manas ona mak tiru tan pistola dala rua ba leten. Bainhira, nia parte tiru hotu hamata fila fali pistola ba iha nia fatin parte kanotak nian.

Nia mós konfesa ba Tribunal katak motivu tiru sae pistola tanba atu akalma situasaun iha festa laran no haree katak labarik no inan ferik sira mós hola parte iha festa nee.

Nia akresenta mós katak momentu ne’ebá nia parte la hemu tua tanba moras,  maibé arguido JAP mak hemu hamutuk ho kolega sira seluk.

Nia mós hakfodak  derrepente de’it arguido JAP mosu iha tenda laran tiru rajada de’it hodi rezulta matebian na’in 3 mate no na’in 5 hetan kanek grave.

“Nia (Arguido-JAP) mak tiru vítima sira, ha’u haree iha ha’u nia oin, tanba nia mosu husi parte liman karuk ha’u nian,” tenik arguido FAM iha audiénsia julgamentu.

Nia mós afirma liu tan katak iha momentu ne’ebá nia rasik lahalai husi tenda laran, maibé ajuda vítima sira, hafoin mak entrega aan ba Polisia estasaun eskuadra Nain Feto.

Prosesu audiénsia julgamentu nee adia fila fali ba iha loron 23 jull 2019 no sei kontinua tan iha loron 30 jullu 2019 hodi rona deklarasaun husi arguido, lezadu no testemuñu sira.

Audiénsia  julgamentu nee prezide husi Juiz koletivu Edite Palmira, Sribuana da Costa no juis estajiáriu, Prokuradór reprezenta husi Jacinto Babo, arguido JAP hetan asisténsia legal husi advogadu privadu, Pedro Aparicio Guterres, no arguido FAM hetan asisténsia legal husi Defensor Públiku, Eustaquio Guterres.

Jornalista      : Domingos Piedade Freitas

Editór            : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here