Serimónia funerál Saúdozu Komandante Samba Sembilan (9) iha Semitériu Jardín Eroi Metinar, Dili, Sábadu (06/07/2019). Imajen/ Eugénio Pereira

METINARO, 07 jullu 2019 (TATOLI)-Prezidente Repúblika, Francisco Guterres Lú Olo,  rekoñese Segundu Komandante FALINTIL Rejiaun III, Komandante Jaime Ribeiro “Samba Sembilan (9)” marka diferensa boot  iha istória rezisténsia FALINTIL nian nu’udar asuwa’in ida brani iha funu laran no dixiplina makas ba ninia ierarkia sira.

Prezidente Repúblika, Francisco Guterres Lú Olo entrega bandeira RDTL ba Saudozu Komandante Samba Sembilan (9) nia oan mane, iha Semitériu Jardín Eroi Metinaro, Dili, Sábadu (06/07/2019). Imajen/ Eugénio Pereira

Lú Olo fo sasin katak, hanesan ema militár, Komandante Samba Sembilan aprende no hatene mós polítika, tanba polítika maka orienta nia, no nia kuidadu liu mak ninia na’i ulun sira. Hahú husi Irmaun Kay Rala Xanana Gusmão too ba Taur Matan Ruak ho lider rezisténsia sira seluk.

Lú Olo tenik, Samba Sembilan mós hatudu respeitu ho konsiderasaun ida boot tebe-tebes.

“Bainhira hamutuk ho Samba, iha tempu ida difisil tebe-tebes, Samba ate bele fó aan ba mate para atu defende ami sira ne’ebé sei moris, ho respeitu ida boot tebe-tebes. Komandante Samba. Ó iha ona rai ida ne’e (Jardín Eroi Metinaro), la iha buat ida ke bele selu, maibé maka ida ne’e. Ó nia valór boot ida ne’e sei la nabeen iha rai ida ne’e ninia leten. Maibé sei kuda iha rai ida ne’e nia leten para atu bele buras hodi halo istória ida sei rohan laek,” dehan Prezidente Repúblika iha diskursu  iha ámbitu  serimónia funerál Saudozu Komandante Samba Sembilan iha Semitériu Jardín Eroi Metinaro, Dili, sábadu (06/07/2019).

Xefe Estadu hatutan, pasajen istóriku moris ne’ebé Komandante Samba halo sai memória furak ba lider no liu-liu ba veteranu sira atu hamutuk nafatin hametin unidade luta ne’e.

Membru FALINTIL-Forsa Defeza Timor-Leste (F-FDTL) fó ondra ba Serimónia funerál Saúdozu Komandante Samba Sembilan (9) iha Semitériu Jardín Eroi Metinaruo,Dili, Sábadu (06/07/2019). Imajen/ Eugénio Pereira

Samba bainhira  sei moris, hateten Lú Olo, iha tempu ida la hanesan maka lori nia lori perkursu istória ida naruk  tebes hodi  kompleta luta too tinan 24  depois tun fila fali mai vila (depois de ukun aan) hodi hakotu iis iha semana kotuk.

Perkursu vida ida ne’e maka halo Samba Sembilan sai diferente husi ninia maneira hanoin no hahalok husi dedikasaun serbisu ne’ebé nia presta. Perkursu ida ne’e iha ligasaun direita ho objetivu Timoroan nia hakarak lori Timór ba ukun rasik aan.

Lú Olo fó lembra katak, iha rejiaun III mós maka sai mós fatin ba nia nu’udar Komisáriu Polítiku FRETILIN hamutuk ho eroi gerrilleiru sira seluk no Samba Sembilan trasa polítika no gerrilla kontra inimigu too funu remata.

“Komandante Samba Sembilan, komandante bele sai sasin ba saida maka ha’u ko’alia liu husi mós biografia ne’ebé fó sai ona, Komandante Samba, ema ida ho kapasidade forte boot tebe-tebes nu’udar komandante para bele halo funu duni, komandante ida brani ho espíritu abnegasaun ida kee forte tebe-tebes, fó nia tempu tomak iha tinan 24 nia laran nia sempre prontu enfrenta saida de’it mak nia hasoru iha nia oin hamutuk ho soldadu sira,” Lú Olo hateten.

Husi funu naruk ne’e, Samba nunka sura nia kolen no lahatene saida maka kolen, ohin nia hamriik atu ba tiru malu nia ba, atu ba halo saida de’it nia prontu para atu ba. Nia la sukat nia esforsu atu ba too iha ne’ebé.

“Komandante ida kee ha’u admira tebe-tebes, e komandante ida muinto relijiozu liu, e ninia espíritu abnegasaun entrega totál ba kauza ida libertasaun totál nian maka komandante Samba ne’e duni,” PR  Lú Olo apresia.

Hanesan Komandante, Samba eduka nia aan ho espíritu dixiplina militár ninian forte tebes. Haree husi aspetu tátika no tékniku militár funu ninian no Samba mezmu nunka aprende dehan katak, atu halo funu husi téknika no militár nian oinsá. Maibé iha ai-laran (funu) nia aplika ida ne’e hamutuk ho nia soldadu sira.

Samba eduka mós nia soldadu sira atu sai kombatente ida ne’ebé tuir regra sira hotu ne’ebé militár ida kompletu bele hetan no bele halo funu no espíritu dixiplina ida ne’e maka halo Samba Sembilan marka diferensa iha ninia karakter luta.

“Espíritu dixiplina ida ne’e mak halo nia komandante ida sai diferensa boot tebe-tebes. Espíritu dixiplina ida ne’e maka lori nia atu hetan liután estima husi ninia kuadru luta sira, no husi ninia Primeiru Komandante “Sabica Besicoli” no sira seluk,” tenik nia.

Ho dixiplina ne’ebé Samba hatudu, maka lider rezisténsia tomak hakru’uk no admira tebes ba Samba ninia dedikasaun tomak too nia taka matan ikus iha mundu ne’e.

PR hatutan, Komandante Samba iha ninia vizaun polítika ida klaru, nia hatene katak bainhira nia kaer kilat atu halo saida, no nia la’ós kaer kilat atu oho de’it inimigu ne’ebé mai atu oho nia. Maibé bainhira nia kilat tarutu nia oho inimigu tanba kauza boot ida atu liberta Timor-Leste hetan independénsia.

Ba ida ne’e, Lú Olo hatutan, Samba hatene relasiona estratéjia funu ninia ho komandu operasionál nian atu halo funu oinsá para bele kumpre objetivu estratéjiku ba libertasaun nasionál nian ne’ebé lider da rezisténsia nasionál define para atu bele hala’o.

“Ohin ha’u rona iha ne’e (biografia)  dehan katak,  Komandante Samba Sembilan la iha formasaun formál, maibé ha’u bele dehan, Komandante Samba Sembilan ema ida ke matenek tebe-tebes. Nia hatene orienta nia aan ho nia soldadu sira ba objetivu saida mak nia hakarak ba kada kombate nia halo, objetivu saida nia karakter ne’e ha’u hahi’i de’it maka ida ne’e,” Lú Olo orgullu.

Komandante Samba Sembilan nu’udar ema ida ho karakter si’ak ba ninia soldadu sira, maibé siak ne’e hanesan edukasaun morál ida atu husu ninia soldadu sira bele dixiplina durante funu hodi labele mate.

Jestu ne’ebé PR Lú Olo sei lembra iha funu, iha ai-laran Samba sempre dixiplina ba nia lider sira, bainhira iha funu remata sira deskansa iha laran, nia sempre look sigarru ba nia komandante sira hodi fuma atu bele konversa kona-ba prosesu luta ba servisu ne’ebé nia hala’o no ezekuta.

Lú Olo koñese didi’ak Samba ema ida la ezije buat ida ba nia aan rasik, ba nia soldadu sira, nia hatene katak iha kondisaun ai-laran ninian mak sira hotu moris. Entaun nia la husu ba xefe estadu maiór, Irmaun Taur Matan Ruak no iha altura ne’ebá (iha funu) no ninia kompañeiru luta sira seluk atu fó ida ne’e, ida ne’ebá. Maibé nia rasik ho ninia kapasidade imajinasaun no kriatividade buka para bele asegura nia moris rasik ho nia soldadu sira.

Ikus liu PR dehan, “Ohin ita halibur malu iha ne’e ho sentimentu ida de’it, maibé ho sentidu rua. Ida nu’udar família maka ita hotu família gerrilla ninia, família FALINTIL ninian uluk halo funu, no família ida agora hamutuk ida ne’e no ida seluk hanesan estadu ne’ebé presidente repúblika reprezenta tomak. Adeus Komandante Samba, Adeus-Adeus Obrigadu Boot.”

Jornalista   : Eugénio Pereira

Editór           : Francisco Simões

HAKEREK NO HATÁN

Please enter your comment!
Please enter your name here