DILI, 02 fevereiru (TATOLI)—Prezidente Repúblika, Francisco Guterres ‘Lú-Olo’, kuarta ne’e fó pose ba Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Falur Rate Laek, ho fitun tolu hodi lidera instituisaun FALINTIL-Forsa Defeza Timor-Leste (F-FDTL).
Notísia Relevante: Falur Rate Laek Sei Simu Pose Ba Vise Xefe Estadu Maior Jenerál
Serimónia fó pose ne’e hala’o iha Kuartel Jenerál Fatuhada, iha ámbitu komemorasaun loron transformasaun FALINTIL ba FALINTIL-Forsa Defeza Timor-Leste (F-FDTL) ba dala-21.
Pose ne’e bazea ba dekretu Prezidente Repúblika nian númeru 4/2022, 28 janeiru, 5/2022 no 6/2022, ezonera Tenente Jenerál Tito da Costa Cristovão Lere Anan Timur hosi kargu Xefe Estadu Maiór Jenerál Lere Anan Timur, promove Majór Jenerál Domingos Raul Falur Rate Laek ba postu Tenente Jenerál no nomeia Tenente Jenerál Falur Rate Laek ba kargu Xefe Estadu Maiór Jenerál Forsa Armada.
Iha 21 janeiru 2022, Governu liuhosi reuniaun Konsellu Ministru deside prosesu ne’ebé mai hosi desizaun reuniaun Konsellu Superiór Defeza Militár hodi trata pedidu ezonerasaun Tenente Jenerál, Tito da Costa Cristovão Lere Anan Timur hosi kargu Xefe Estadu Maiór Jenerál Forsa Armada, promosaun no nomieasaun Xefe Estadu Maiór Jenerál Forsa Armada.
Bazea ba proposta husi Governu, iha 27 janeiru, Prezidente Repúblika rona hanoin sira husi Konsellu Superiór Defeza no Seguransa kona-ba ezonerasaun no nomeasaun, tuir artigu 86 alinea m) Konstituisaun Repúblika Demokrátika Timor-Leste (KRDTL) dekreta ezonerasaun Tenente Jenerál Lere Anan Timur hosi nia kargu Xefe Estadu Maiór Jenerál Forsa Armada no nomea Tenente Jenerál Falur Rate Laek ba kargu Xefe Estadu Maiór Jenerál.
Ezonerasaun ba kargu Xefe Estadu Maiór Jenerál Forsa Armada no bazea ba prosedimentu no kondisaun sira define kona-ba promosaun alta xefia militár tuir Estatutu foun Militár FALINTIL-Forsa Defeza Timor-Leste (F-FDTL) no tuir desizaun Konsellu Ministru ba promosaun Majór Jenerál Domingos Raul Falur Rate Laek, Prezidente Repúblika promove Falur Rate Laek ne’ebé ezerse kargu nu’udar Vise-Xefe Estadu Maiór Jenerál ba Tenente-Jenerál.
Tuir Estatutu foun Militár ejize katak kargu Xefe Estadu Maiór Jenerál Forsa Armada okupa hosi ofisiál Jenerál ho postu Tenente Jenerál ka Vise-Almirante.
Prezidente Repúblika, tuir proposta Governu nian no reuniaun Konsellu Superiór Defeza no Seguransa, liuhosi dekretu Prezidente Repúblika, nomea Tenente Jenerál Falur Rate Laek ba Xefe Estadu Maiór Jenerál Forsa Armada.
Prezidente Repúblika, iha kinta 27/01, rona hanoin sira hosi membru Konsellu Superiór Defeza no Seguransa kona-ba desizaun Konsellu Ministru iha 21 janeiru nian relasiona ho ezonerasaun, promosaun no nomeasaun alta xefia militár.
Dekretu Prezidente Repúblika númeru 4/2022 kona-ba ezonerasaun Tenente Jenerál Lere Anan Timur hosi kargu Xefe Estadu Maiór Jenerál, dekretu Prezidente Repúblika númeru 5/2022 kona-ba promosaun Majór Jenerál Falur Rate Laek ba postu Tenente Jenerál no dekretu Prezidente Repúblika númeru 6/2022 kona-ba nomeaisaun Tenente Jenerál Falur Rate Laek ba kargu Xefe Estadu Maiór Jenerál tama iha vigor iha 28 janeiru 2022.
Biban ne’e, Prezidente Repúblika ho Tenente Jenerál emposadu asina termu pose, no juramentu hosi emposadu.
“Jura ba maromak no povu ho onra kumpre ho lealdade ba knaar ne’ebé simu sei hala’o tuir de’it konstituisaun no lei ho dedikasaun enérjia ho kapasidade tomak defeza no konsolidasaun indepedensia no unidade nasionál,” Tenente Jenerál Falur Rate Laek firme iha nia juramentu
Iha serimónia ne’e, Prezidente Repúblika fó sasin hodi halo transferensia servisu hosi Tenente Jenerál Reformadu, Leren Anan Timur ba Tenente Jenerál foun no entrega servisu ba emposadu.
Entertantu, partisipa iha komemorasaun loron transformasaun F-FDTL ne’e marka prezensa hosi Primeiru Ministru, Taur Matan Ruak, Prezidente Parlamentu Nasionál, Aniceto Longuinhos Guterres Lopes, Prezidente Tribunál Rekursu, Deolindo dos Santos, eis titulár órgaun soberania, menbru Governu, veteranu, korpu diplomátiku, komunidade, miliár no seluk tan.
Notísia Relevante: PR ezonera Lere no nomeia Falur ba Xefe Estadu Maiór Jenerál
Jornalista : Nelson de Sousa
Editór : Cancio Ximenes
