Falur Rate Laek

DILI, (TATOLI) – Brigadeiru Jenerál Falur Rate Laek sei simu pose hosi Prezidente Repúblika atu asume kargu vise Xefe Estadu Maior Jenerál FALINTIL-Forsa Defeza Timor-Leste (F-FDTL) iha segunda (1/10).

Xefe Estadu Maior Jenerál, Lere Anan Timur, ba jornalista sira iha Palásiu Prezidente Nicolau Lobato, Bairru Pité, kuarta ne’e, hafoin hala’o enkontru ho Prezidente Repúblika, Francisco Guterres Lú Olo, hodi ko’alia kona-ba situasaun seguransa no defeza rai laran.

Falur Rate Laek indijita hosi Primeiru-Ministru, Taur Matan Ruak, hafoin instituisaun F-FDTL aprezenta naran rua ba Governu maka hanesan Brigadeiru Jenerál Sabica Besi Kulit no Falur Rate Laek rasik.

Lere hateten sira (entre eis líder rezisténsia) toman malu ona, tan ne’e sé maka mai mós laiha problema, maibe dezafiu ba sira iha aban bainrua maka pasajen lideransa gerilia ba forsa regulár ne’e maka komplikadu.

“Ami la’ós foin maka atu serbisu hamutuk maibé serbisu hamutuk dezde situasaun difisil iha tempu rezisténsia no agora serbisu hamutuk nafatin. Entre ami problema laiha, tanba ami transparénsia ba malu no ami nunka subar sasán ba malu. Kuandu ami sente buat ruma, ami ko’alia momoos ba malu. La’ós tú fali hosi kotuk no ne’e lulik, tanba ita nia maluk barak mate”, nia tenik.

Lere esplika vise Xefe Estadu nia kn’ar atu ajuda Xefe Estadu Maior Jenerál hodi dezenvolve instituisaun FALINTIL-Forsa Defeza Timor-Leste (F-FDTL).

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here