DILI, 24 juñu 2021 (TATOLI) – Atleta natasaun Timor-Lete nian, Imelda Felicita Ximenes Belo ho José João Viegas da Silva, prontu ona atu kompete iha Olympics Games 2020 iha Tokyo-Japaun.
Notísia Relevante : Atleta natasaun na’in-rua kontinua treinu molok partisipa iha Olímpiku Japaun
Tuir oráriu ne’ebé iha atleta Timor-Leste nian atu arranka ba Tokyo, Japaun, iha loron 12 jullu fulan oin.
Prezidente Federasaun Natasaun Timor – Leste (FNTL), Laurentino Guterres hateten, preparasaun atleta na’in-rua ne’ nian hahú kedas iha 2020 no másima tebes. tanba ne’e, FNTL fiar katak Imelda Felicita Ximenes Belo ho José João Viegas da Silva sei partisipa ho di’ak iha eventu internasionál ne’e.
“Maski sira-nia preparasaun iha difikuldade barak, maibé federasaun buka meiu atu rezolve, difikuldade mak hanesan laiha pixina própriu para sira hala’o treinamentu, maibé ami konsege selu pixina Hotel sira nian iha Dili laran no barak liu ba treinu iha Pixina Baucau,” Laurentino Guterres, hateten hodi responde Agência Tatoli iha Komité Olímpiku Nasionál Timor – Leste (CONTL-sigla Portugés) Dili, kinta ne’e.
Hare ba loron besik ona atu arranka ba Tokyo-Japaun hodi partisipa jogu internasionál ne’e, FNTL komunika ona ho Komandante FALINTIL-Forsa Defeza Timor-Leste (F-FDTL) komponente Naval Hera nia pixina hodi hala’o treinamentu ne’ebé másimu.
Jornalista : Hortencio Sanchez
Editór : Francisco Simões
