DILI, 06 agostu 2020 (TATOLI)-Ministra Saúde, Odete Maria Freitas Belo, hateten susu-ben inan nian saudavel ba labarik sira saúde tanba ne’e husu atu inan sira iha Timor-Leste tenki fó susu oan ho susu-ben inan nian.
“Ita haree inan nia susu-ben mak importante liu, bainhira ita fó inan-nia susu-ben hosi labarik nia moris to’o nia tinan rua di’ak tebtebes tanba tanba susu-ben kinur ne’e importante ba inan hodi fó forsa ba labarik,”dehan Governante ba jornalista sira iha HNGV, kinta ne’e relasiona ho semana mundiál ba susu-ben inan nian.
Notísia Relevante :Susubeen Inan Nakonu Imunidade Ba Bebé Hodi Kontra Infesaun
Mundu tomak selebra semana mundiál ba susu-ben inan nian durante loron 01 to’o 07 fulan-agostu ho tema susu-ben inan nian ajuda bebé nia moris inisiu ne’ebé saudavel liu, mai ita hamutuk proklama importansia husi susu-ben inan nian. Hamutuk ita bele reenforsa inan-aman no abilita ina sira fó susu agora no ba futuru.
Nia dehan fó susu labarik ho susu-ben inan-nian kontribui ba hamenus gastu orsamentu iha família tanba la sosa susu ben instan hodi fó ba labarik sira.
Notísia Relevante :OMS Rekomenda Fó Susu-Been Inan Ba Bebé Iha Oras Ida-Nia Laran
“Ida ne’e kontribui mós ba ekonomia tanba osan ne’ebé iha bele hola fali hahán ne’ebé fó saúde di’ak hodi fó susu-ben di’ak ba labarik,”tenik Odete.
Susu-ben instan bele provoka atu hamosu oioin ba labarik sira hanesan diárea no seluk tan.
“Susu ita fó ba labarik lá liu-hosi inan impaktu mós iha kaundu bibiron fase la mós bele halo labarik hetan diarea,”nia hatutan.
Jornalista : Hortencio Sanchez
Editór : Agapito dos Santos
