Selesaun nasionál seniór hahú treinu tékniku no fíziku iha Bali
DILI, 15 jullu 2022 (TATOLI)– Ekipa selesaun nasionál seniór Timor-Leste, hahú hala’o treinu fíziku no tékniku iha Bali-Indonézia, hodi prepara-an hala’o jogu amigavél hasoru ekipa senior Filipina, iha loron 18 jullu.
Kapitaun Ekipa Selesaun, Filomeno Juniór da Costa, informa atividade treinu tama ona iha faze tátika no tékniku atu jogadór-sira bele halo jogu ho di’ak kontra Filipina.
Notísia relevante: Aban, selesaun nasionál seniór arranka bá Bali
“Maske, jogu amigavél, maibé reprezenta nasaun. Nune’e ami durante preparasaun iha ne’e di’ak tebes, agora tama ona iha faze tátika no tékniku atubele kontra Filipina. Tanba ita hatene ekipa Filipina ne’e forte,” Kapitaun selesaun nasionál senór ne’e, hateten ba Agência TATOLI via WhatsApp, sesta ne’e.
Alende ne’e, nia afirma jogadór na’in-18, hala’o atividade treinu iha kampu ne’ebé di’ak, hela fatin di’ak no ai-han ba sira mós sufisiente tuir padraun internasionál.
“Ami preparadu atu enfrenta jogu hasoru Filipina no sei hatudu rezultadu ka prestasaun ne’ebé di’ak,” nia kompromete.
Jogu amigavél ne’e importante hodi koko ekipa Timor-Leste nia forsa. Tanba, iha tempu besik ekipa seniór sei kompete mós iha kopa Mitsubishi AFF 2022 nian.
Notísia relevante: Semana oin, selesaun nasionál seniór hahú treinamentu
Jornalista: Hortencio Sanchez
Editór : Florencio Miranda Ximenes
