Sekretáriu Jerál FFTL, Nélio Isaac Sarmento. Imajen Tatoli/ Egas Cristóvão

DILI, 11 juñu 2021 (TATOLI) – Sekretáriu Jerál Federasaun Futeból Timor-Leste (FFTL) Nelio Isaac Sarmento, informa jogadór selesaun nasionál, semana oin, hahú  treinamentu  tanba maioria jogadór sira vasina  ona. Maske nune’e, FFTL kontinua aplika protokolu saúde públiku ba luta kontra COVID-19.

Notísia Relevante : FFTL husu Governu akompaña situasaun desportu 

“Durante fulan-tolu ami nia atividade futeból selesaun nian paradu, agora iha fali posibilidade uitoan ba jogadór selesaun nasionál-sira atu hala’o treinamentu, maibé bazeia ba protokolu saúde mundiál nian, entaun ohin ami fó hatene ona ba jogadór-sira atu disiplina, kuidadu sira nia-an atu segunda hanesan ne’e sira hahú ona treinamentu,” Nelio Isaac Sarmento  hateten ba Agéncia Tatoli iha edifísiu FFTL, Dili, sesta ne’e.

Nia informa, FFTL hetan ona komunikasaun ho Sekretáriu Estadu Juventude no Desportu (SEJD) tanba tuir informasaun Governu mós iha ona hanoin atu fó kondisoens di’ak ba atividade desportiva sira lao.

“Iha komunikasaun ami nian, Sekretáriu Estadu  Juventude no Desportu sei kria sentru vasina ida ba modalidade desportu hotu atu halo vasina, maibé ami nian iha ne’e selesaun nasionál seniór feto-mane hetan hotu ona vasina no semana agora tama ba vasina  doze daruak, entaun ami iha ona kondisoens hala’o treinamentu,” Nelio Isaac Sarmento hateten

Eis Sekretáriu Estadu Komunikasaun Sosiál (SEKOMS)  ne’e afirma, esforsu hirak ne’e tenke hala’o tanba obrigatóriamente selesaun nasionál tenke partisipa iha jogu Internasionaís sira. Tanba ne’e, FFTL iha hanoin ekipa Timor-Leste la’ós atu ba kompleta de’it, maibé tenke hatudu duni profisionál jogu ba mundu.

Preparasaun ne’ebé agora hala’o tanba iha fulan agostu mai ne’e, ekipa nasionál Timor-Leste seniór sei partisipa jogu Suzuki Cup no total jogadór ne’ebé agora atu hala’o treinamentu hamutuk na’in-30.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here