OÉ-CUSSE, 09 jullu 2022 (TATOLI)—Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, selebra akordu ho Sekretáriu Estadu Kooperativa, Elizário Ferreira, ba implementasaun programa Cesta Bázika faze daruak iha suku 10, sub-rejiaun Oésilo Pássabe no Nítibe.
Sekretáriadu Estadu Kooperativa, Elizário Fererira, hateten, Governu ho nia inisiativa oferese nesesidade bázika hodi sustenta nesesidade família iha ámbitu pandemia COVID-19, ho ai-han produtu lokál ne’ebé nakonu ho nutrisaun.
“Programa ne’e hanesan kontinuasaun atu rekupera hikas ekonomia família, ne’ebé iha diferénsa oituan hosi tinan 2021 ne’ebé ema hotu simu, maibé faze daruak ne’e la’e, ba hirak ne’ebé ho saláriu $500 ba leten sei la simu, só sira-ne’ebé simu saláriu $500 mai kraik mak bele hetan. Ida-ne’e ba de’it família ne’ebé nesesitadu duni,” Sekretáriu Estadu dehan iha ámbitu selebrasaun akordu, iha salaun dominikana Oé-cusse, sábadu ne’e.
Notísia relevante: Autoridade RAEOA selu ona kompañia 21 fornese Cesta Bázika
Tuir governante ne’e, prosesu tenke liuhosi konkursu ida, nune’e empreza sira konkorre hodi sai manan-na’in, tanba ne’e ninia prosesu mós diferente oitoan ho faze dahuluk.
Aleinde ne’e, Ministériu Turizmu Komérsiu no Indústria (MTKI) sei implementa iha sub-rejiaun Pante Makasar, iha semana oin.
Iha biban hanesan, Prezidente Autoridade RAEOA, Arsénio Paixão Bano, hateten, akordu ne’e atu kobre implementasaun programa iha iha sub-rejiaun tolu ba benefisiáriu hamutuk 40.000 resin.
“Kooperasaun ne’e sei ajuda, nune’e iha fulan ne’e nia laran ita halo preparativu. Ha’u hanoin tama agostu to’o setembru ita bele fahe ona. Orsamentu Cesta Bázika ba RAEOA hamutuk millaun $2 resin,” nia informa.
Nia dehan, mekanizmu implementasaun programa nasionál ne’e iha RAEOA sei kumpre tuir regulamentu ne’ebé implementa ona iha Governu sentrál, liuhosi prosesu aprovizionamentu, ne’ebé parte Oé-cusse sei halo de’it hanesan faze dahuluk ba pre-kualifikasaun.
“Empreza sira-ne’ebé uluk iha ona esperiénsia fahe Cesta Bázika, sei konvida sira atu tuir filafali prosesu aprovizionamentu no halo aprezentasaun kuotasaun ba prosesu sira-ne’e,” Prezidente Autoridade fundamenta.
Prezidente Autoridade mós apela ba grupu kooperativa, emprezáriu no autoridade lokál sira iha rejiaun ne’e hodi hahú organiza-an hodi prepara produtu lokál sira tanba autoridade RAEOA sei kontaktu to’o iha baze atu maksimiza produtu lokál sira integra iha Cesta Bázika.
“Autoridade planeia, distribuisaun faze daruak ne’e tenke diferente aumenta produtu seluk ne’ebé prodús ona hosi agrikultór sira, nune’e osan bele sirkula iha teritóriu Oé-cusse,” nia fó hanoin.
Programa nasionál ne’e la’o ho baze legál, ne’ebé previstu iha dekretu-lei númeru 10/2022, 04 marsu, hamutuk ho diploma konjunta hosi ministériu implementadór no Sekretariadu Tékniku.
Prosesu distribuisaun Cesta Bázika iha faze dahuluk, bazeia ba lei katak bele halo ajudikasaun direita ba empreza sira ne’ebé iha kapasidade finanseira no kualifikadu, maibé iha faze daruak ne’e haree pur koutasaun.
Programa Cesta Bázika faze daruak tau importánsia ba produtu rai-laran, ne’ebé admite tenke atinje 75% no produtu importadu 25% hodi kompleta.
Nune’e, produtu importasaun ne’ebé inklui iha Cesta Bázika mak hanesan masin-midar, ijene, femenina, mina-sona no deterjente, enkuantu produtu lokál mak hanesan alimentár kompostu hosi ai-han ne’ebé kontein karbohidratu, proteina, inklui produtu seluk hanesan produtu ijiene no produtu ijiene femenina.
Benefisiáriu Cesta Bázika faze dahuluk iha RAEOA hamutuk 85.159, hosi uma-kain hamutuk 20.342 ne’ebé mai hosi suku 18 iha sub-rejiaun haat.
Jornalista : Abílio Elo Nini
Editora : Julia Chatarina
