Cesta Básica.

OÉ-CUSSE, 29 jullu 2021 (TATOLI) — Autoridade Rejiaun Administrativa Espesiál Oé-Cusse Ambeno (RAEOA), halo ona pagamentu ba kompañia 21 ne’ebé durante ne’e halo fornesimentu ba programa Cesta Bázika.

“Programa Cesta Bázika iha Oé-Cusse daudaun ne’e autoridade halo ona pagamentu ba kompañia hamutuk 21 ho nia montante orsamentu hamutuk millaun $2.753.481.60, foti hosi orsamentu ba Cesta Bázika ne’ebé Guvernu sentrál aloka mai RAEOA hamutuk millaun $4.589.701,” Sekretária Rejionál Asuntu Finansa, Maria Eliza Maniquin, informa ba Agênsia TATOLI, iha nia kna’ar-fatin, Oébau, suku Costa, sub-rejiaun Pante Makasar, kinta ne’e.

Nia haktuir, iha inísiu kompañia hamutuk 23 mak halo distribuisaun ba programa Cesta Bázika nune’e autoridade selu ona kompañia 21 no falta empreza (2) tanba dokumentu balun seidauk kompleta.

“Saldo disponivel osan restu sei iha hela, no osan ne’e sei uza ba distribuisaun reklamante Cesta Bázika sira, tanba autoridade aloka ona osan nune’e iha tempu badak sei distribui tán apoia ai-han ba sira-ne’ebé seidauk simu,” nia katak.

 Jornalista: Abilio Elo Nini

Editor: Cancio Ximenes

HAKEREK NO HATÁN

Please enter your comment!
Please enter your name here